Pas vendimit të Gjykatës Speciale në Hagë për ish-krerët e Ushtrisë Çlirimtare të Kosovës, Organizata e Veteranëve të Luftës së UÇK-së ka paralajmëruar një protestë gjithëpopullore në Prishtinë.
Syla tha se OVL e UÇK-së e kundërshton vendimin e Gjykatës Speciale dhe e cilësoi atë si një goditje ndaj figurave që, sipas tij, përfaqësojnë luftën çlirimtare të Kosovës. Ai theksoi se qëndrimi i organizatës së veteranëve është se lufta e UÇK-së nuk mund të paraqitet si një ndërmarrje kriminale dhe se vendimet gjyqësore nuk mund të ndryshojnë atë që ata e konsiderojnë si historinë e çlirimit të Kosovës.
Syla tha se kjo nismë synon të krijojë një qëndrim të koordinuar në periudhën në vijim, veçanërisht deri në shqyrtimin e çështjes në Apel. “Deri në procesin e Apelit kërkojmë përfshirjen e institucioneve tona në këtë drejtim”, u shpreh ai.
Në vijim të deklaratës së tij, përfaqësuesi i OVL-së njoftoi edhe për një tjetër aktivitet që do të zhvillohet gjatë ditës së sotme në Prishtinë. Ai tha se në orën 16:30 do të prezantohet platforma e re dhe më pas përfaqësuesit e shoqatave do t’u bashkohen studentëve që ndodhen në shesh.
Protesta e së premtes është thirrur në një moment kur në Kosovë ka reagime të shumta pas vendimit të Gjykatës Speciale në Hagë. OVL e UÇK-së u ka bërë thirrje qytetarëve që t’i bashkohen tubimit në sheshin “Skënderbeu”, ndërsa paralajmëron se shoqatat e dala nga lufta do të vazhdojnë koordinimin e tyre edhe në ditët në vijim.
Marrë nga Balkanweb.com
