Mynihu, shtëpia e festivalit të birrës me famë botërore në Gjermani, Oktoberfest, do të hapë të enjten Biergarten (kopsht birre) e tij të parë pa alkol, në shenjë ndryshimi të zakoneve të konsumit.
Die Null (The Zero) pranë stacionit kryesor hekurudhor të kryeqytetit bavarez, do t’u shërbejë klientëve të tij ekskluzivisht pije joalkoolike, mocktails, lëngje, ujë dhe birra joalkoolike.
Operatorët e restoranteve, hoteleve dhe objekteve kulturore aty pranë, janë ankuar prej kohësh për turistët, që dalin nga trenat duke pirë së tepërmi, së bashku me vendasit.
Në ambientet e hapura klientët do të lejohen të sjellin ushqimin e tyre dhe do të ketë argëtim falas nga grupet, koret dhe artistët solo, si dhe netët me muzikë me DJ.
Synimi i Mynihut është, që zona të “përmirësohet”, tha administrata e qytetit, pasi pirja e birrës vazhdon të bjerë në mënyrë të vazhdueshme në Gjermani.
Pronari i barit, Florian Schönhofer, një nga mbështetësit e Die Null, tha se qëllimi i sipërmarrjes nuk ishte të largohej përgjithmonë nga alkoli, por të tregonte se kishte alternativa tërheqëse.
Ai tha se reagimi ndaj planeve deri më tani ka qenë pozitiv.
“Megjithatë, ne ndoshta do të kemi humbje,” tha ai, duke vënë në dukje se ndërsa kishte klientë, që mund të pinin 10 birra në një natë, pak do të porosisnin 10 lëngje frutash.
Die Null, i cili do të hapet nga kryetari i bashkisë së qytetit, Dieter Reiter, do të zgjasë deri më 15 shtator, pak më pak se një javë para fillimit të Oktoberfest.
