Protesta e studentëve shqiptarë ka marrë jehonë ndërkombëtare, duke tërhequr vëmendjen edhe të mediave italiane, të cilat kanë pasqyruar zhvillimet e fundit në Tiranë dhe përshkallëzimin e protestave kundër qeverisë së kryeministrit Edi Rama. Në një artikull të publikuar nga media italiane, përshkruhen dy ditë protestash të shoqëruara me tensione, përplasje me policinë dhe dëmtime në disa institucione publike në kryeqytet.
Sipas artikullit, protesta nisi me studentët, të cilët përmes thirrjeve në rrjetet sociale kërkuan bojkotimin e mësimit dhe u mblodhën përpara Ministrisë së Arsimit. Kërkesat e tyre lidhen me tarifat universitare, mbështetjen për të rinjtë dhe mungesën e perspektivave të punësimit pas përfundimit të studimeve. Megjithatë, demonstratat u zgjeruan përtej problematikave të arsimit, duke u shndërruar në pjesë të një lëvizjeje më të gjerë kundër qeverisë së Edi Ramës.
Media italiane shkruan se situata u përshkallëzua fillimisht pranë Ministrisë së Arsimit, ku grupe protestuesish hodhën mjete ndezëse dhe sende të forta në drejtim të ndërtesës dhe policisë. Gjatë përplasjeve u dëmtuan barriera, u dogjën kosha mbeturinash dhe u raportuan flakë në disa zyra të ministrisë. Ajo thekson se u dëmtuan gjithashtu ambiente bankash dhe biznese të tjera, ndërsa zjarret u përhapën në disa zona të qendrës së Tiranës.
Protestat vijuan edhe në drejtim të institucioneve të tjera shtetërore. Sipas përshkrimit të medias italiane, protestuesit dëmtuan ambientet e Ministrisë së Ekonomisë, ndërsa në shënjestër u vunë edhe Parlamenti dhe Gjykata Kushtetuese. Artikulli thekson se policia ndërhyri me gaz lotsjellës dhe topa uji për të shpërndarë turmat dhe për të rivendosur rendin. Përplasjet dhe dëmtimet e raportuara e shndërruan protestën në një prej zhvillimeve kryesore politike dhe shoqërore të pasqyruara nga media.
Përtej kërkesave studentore, artikulli evidenton edhe pakënaqësitë që lidhen me një projekt turistik luksoz në jug të Shqipërisë, i lidhur me Jared Kushner, dhëndrin e Donald Trump. Sipas medias italiane, kundërshtimet ndaj këtij projekti, veçanërisht për ndikimin e mundshëm mjedisor, janë ndër elementet që kanë kontribuar në zgjerimin e lëvizjes protestuese. Kështu, protesta nuk paraqitet vetëm si një reagim ndaj problematikave të studentëve, por edhe si shprehje e pakënaqësive më të gjera ndaj politikave qeveritare.
Marrë nga Dosja.al
