Qiratë në Shqipëri kanë shënuar një rritje më të lartë se mesatarja e Bashkimit Europian gjatë vitit 2025, duke reflektuar presionin në rritje mbi tregun e banesave.
Sipas të dhënave të fundit, qiratë në vend u rritën me 4.5%, ndërsa mesatarja në BE ishte 3.1%.
Kjo diferencë tregon se edhe pse Shqipëria nuk është në nivelet ekstreme të disa vendeve europiane, tendenca e rritjes është mbi normën mesatare të kontinentit.
Në rajon, vende si Mali i Zi dhe Kroacia kanë regjistruar rritje më të forta, përkatësisht 18.5% dhe 17.6%, ndërsa Greqia ka arritur në 10%.
Në nivel europian, shtrenjtimi i qirave lidhet drejtpërdrejt me një fenomen të thjeshtë ekonomik: Kërkesa po rritet më shpejt se oferta.
Ekspertët theksojnë se çmimet e larta të blerjes së banesave dhe normat e interesit për kreditë kanë shtyrë gjithnjë e më shumë familje drejt tregut të qirave, duke rritur presionin mbi çmimet.
Në të njëjtën kohë, oferta është ngushtuar për shkak të ndryshimeve fiskale dhe rregullatore, si dhe kostove në rritje për mirëmbajtjen dhe përmirësimin e eficiencës energjetike të banesave.
Kjo ka bërë që shumë pronarë të tërhiqen nga tregu ose të mos investojnë në prona për qira.
Në disa vende europiane, si Finlanda, Gjermania apo Franca, rritja e qirave ka mbetur nën mesataren e BE-së, duke reflektuar tregje më të balancuara.
Ndërsa në Shqipëri, edhe pse rritja është më modeste krahasuar me vendet me dyshifrore, ajo mbetet mbi mesataren europiane, duke e bërë më të vështirë për qytetarët sigurimin e një strehimi të përballueshëm.
Marrë nga Skyweb.al
