Vendimi i gjykatës ngre pikëpyetje pas përplasjes së armatosur në ‘Regina Palm’: Luan Muça lirohet me detyrim paraqitjeje, ndërsa në arrest shtëpie përfundon Angjelo Breshani, njeriu i Vasil Bedinajt që dyshohet se qëlloi me armë drejt automjetit ku ndodheshin njerëzit e Muçës. Në qeli pronari i ‘SWAT Security’ dhe dy persona të tjerë.
Gjykata ka vendosur detyrim paraqitjeje për biznesmenin Luan Muça, pronar i ‘Delta Group’, pas sherrit të armatosur të ndodhur në ambientet e ‘Regina Palm’ në Vlorë.
Një zhvillim që ka tërhequr vëmendjen për mënyrën se si janë caktuar masat e sigurisë, Angjelo Breshani, personi i Vasil Bedinajt i cili dyshohet se qëlloi me armë në drejtim të ‘Range Rover’-it, është lënë në arrest shtëpie.
Ndërkohë, gjykata ka vendosur arrest me burg për Mandrit Lleshajn, pronar i kompanisë ‘SWAT Security’, kompani e liçensuar, rojet e së cilës shoqëronin Luan Muçën.
Në burg janë lënë gjithashtu shqiptari nga Kosova, Blerim Heta, dhe Klaudio Lleshaj.
Vendimi për masat e sigurisë vjen në një kohë kur hetimet vijojnë për të zbardhur plotësisht dinamikën e konfliktit dhe për të përcaktuar përgjegjësitë individuale të personave të përfshirë.
Përplasja e armatosur në hotelin ‘Regina Palm’ u shoqërua fillimisht me pretendime se pas saj fshihej një gjobë prej 5 milionë eurosh, pretendim i ngritur nga biznesmeni Vasil Bedinaj ndaj Luan Muçës.
Por Muça i ka kundërshtuar këto pretendime në dëshminë e tij, duke dhënë një tjetër version për motivin e konfliktit. Sipas tij, përplasja lidhet me një konflikt pronësie në jug të vendit dhe me pretendime mbi ligjshmërinë e dokumentacionit të një prone në bregdet.
Pra, pista e gjobëvënies e ngritur nga Bedinaj ka rënë.
Pas përplasjes në hotel, dy prej personave të përfshirë u aksidentuan në urën e Peshkëpisë, në hyrje të Vlorës.
Nga hetimet rezultoi gjithashtu se dy persona të tjerë të përfshirë në konflikt ishin punonjës të Policisë Ushtarake, ndaj të cilëve u mor masa e pezullimit.
Në lidhje me ngjarjen janë shpallur në kërkim edhe gjashtë persona të tjerë, ndërsa çështja i ka kaluar strukturave të Krimeve të Rënda të Policisë së Vlorës.
Ngjarja shkaktoi reagime të shumta edhe në nivel politik. Kryeministri Edi Rama bëri një ndërhyrje edhe më brutale se sherri në fjalë duke folë para organeve të drejtësisë dhe ku tha se pronën do ta shpronësojë.
Marrë nga Syri.net
