“Për shkak të një ere intensive në nuhatje”, forcat e kontrollit doganor zbuluan gjatë një inspektimi të dielën (03.05.2026) disa çanta në bagazhin e një autobusi turistik që vinte nga Kosova, njoftoi dogana të hënën në kryeqytetin e landit Baden-Vyrtemberg, Shtutgart.
Në çanta ndodheshin rreth 253 kilogramë produkte mishi, të cilat po tentohej të futeshin në mënyrë të paligjshme në Gjermani. Sipas të dhënave, autobusi kishte ardhur nga Kosova.
Sekuestrohen edhe mallra të tjera të padeklaruara
Sipas doganës, këto nuk ishin të vetmet mallra të dyshuara për kontrabandë. Në automjet, oficerët zbuluan gjithashtu 700 cigare të importuara në mënyrë ilegale, si edhe katër dritare alumini me grila, një kuzhinë dhe një imppiant klimatizimi, të cilat ishin futur në BE pa deklarim doganor.
Po ashtu u gjet edhe një këlysh qeni pesëmuajsh i racës Maltipoo, i cili dyshohet se po transportohej për qëllime tregtare. Kafshës i mungonte dëshmia e vaksinimit kundër tërbimit, ndaj u dërgua në karantinë në një strehë për kafshë.
Ndaj dy shoferëve të autobusit dhe një personi që merrte mallrat në terminalin e autobusëve në aeroportin e Shtutgartit janë hapur procedura penale tatimore. Shoferët duhet gjithashtu të përballen me një gjobë për import të paligjshëm ushqimesh, bëri të ditur dogana.
Sipas autoriteteve, për importin e mishit zbatohen rregulla veterinare me qëllim parandalimin e përhapjes së sëmundjeve të kafshëve. Të gjitha mallrat e dyshuara të kontrabandës në autobus u sekuestruan.
Marrë nga AFP
