Gjykata e Lartë njoftoi të martën se ka vendosur të shtyjë seancat gjyqësore deri në një afat të pacaktuar, pasi zjarri i shkaktuar gjatë protestave antiqeveritare të së shtunës dëmtoi infrastrukturën e institucionit dhe dokumentacionin gjyqësor.
Sipas njoftimit zyrtar, zjarri i 17 tetorit ka shkaktuar dëme materiale në ambientet e gjykatës, përfshirë edhe dosje gjyqësore, duke cenuar kushtet për zhvillimin normal të veprimtarisë së institucionit më të lartë gjyqësor në vend.
“Kjo situatë e jashtëzakonshme ka ndikuar në kushtet e zhvillimit normal të veprimtarisë gjyqësore, duke bërë të domosdoshme marrjen e masave për vlerësimin e plotë të dëmeve dhe garantimin e integritetit të dokumentacionit gjyqësor”, deklaroi Gjykata e Lartë.
Institucioni bëri të ditur se të gjitha seancat e planifikuara do të shtyhen, me përjashtim të çështjeve me natyrë urgjente, deri në përfundimin e verifikimit të dëmeve dhe vlerësimit të gjendjes së dosjeve.
Gjykata nuk dha një shifër për numrin e dosjeve të dëmtuara dhe as një afat se kur pritet të rikthehet veprimtaria normale.
Sipas njoftimit, personat që rezultojnë të prekur nga dëmtimi i dokumentacionit gjyqësor do të informohen individualisht, ndërsa datat e reja të seancave do të publikohen përmes faqes zyrtare të institucionit.
Gjykata e Lartë e cilësoi situatën si të paprecedentë dhe kërkoi mirëkuptimin e palëve ndërgjyqëse dhe avokatëve për vonesat që mund të shkaktohen.
Dëmtimi i institucionit vjen në mesin e një vale protestash antiqeveritare që kanë përfshirë Tiranën dhe qytete të tjera të Shqipërisë prej më shumë se një jave. Të udhëhequra kryesisht nga të rinj dhe studentë, protestat kërkojnë dorëheqjen e kryeministrit Edi Rama, të cilin e akuzojnë për korrupsion, mungesë perspektive ekonomike dhe koston e lartë të jetesës.
Protestat janë shoqëruar me përplasje të dhunshme mes demonstruesve dhe policisë, përdorim të gazit lotsjellës dhe plumbave të gomës, si dhe dëmtime të pronës publike dhe private. Organizatat e të drejtave të njeriut dhe ato të gazetarëve kanë ngritur shqetësime për përdorimin e forcës nga policia dhe arrestimet masive të protestuesve, përfshirë të mitur.
Dëmtimi i dosjeve dhe ndërprerja e seancave në Gjykatën e Lartë shtojnë pasojat institucionale të trazirave, duke krijuar pasiguri për palët që presin shqyrtimin e çështjeve të tyre gjyqësore.
Marrë nga Reporter.al
