Fondacioni “Drejtësi për Lojtarët” me seli në Danimarkë ka ngritur një padi kolektive penale kundër FIFA-s dhe pesë organizatave të tjera të futbollit, duke cituar një vendim të Gjykatës Evropiane të Drejtësisë që gjeti shkelje të rënda të të drejtave të punës dhe të tregut.
Në padinë, të ngritur në emër të deri në njëqind mijë futbollistëve profesionistë, fondacioni kërkon kompensim për të gjithë lojtarët që mund të kenë humbur një pjesë të të ardhurave ose fitimeve të tyre për shkak të rregullave kufizuese mbi transferimet dhe ndërprerjen e kontratave.
Fondacioni ka ftuar të gjithë futbollistët meshkuj dhe femra që kanë luajtur në Bashkimin Evropian ose Mbretërinë e Bashkuar që nga viti 2002 të bashkohen me padinë kolektive, e cila ka një bazë të fortë ligjore në një vendim të Gjykatës Evropiane të Drejtësisë vitin e kaluar.
Vendimi zbuloi se FIFA kishte shkelur ligjin e konkurrencës të BE-së për vite me radhë dhe kishte kufizuar lëvizjen e lirë të punëtorëve. Vendimi bazohet në rastin e ish-lojtarit të Real Madridit Lassana Diarra, transferimi i të cilit nga klubi rus Lokomotiv në klubin belg Charleroi u bllokua nga FIFA.
Gjykata Evropiane e Drejtësisë ka vendosur që rregullat e FIFA-s për ndërprerjen e kontratave janë të paligjshme sepse ato i pengojnë lojtarët të largohen nga një klub pa “arsye të justifikuar“, gjë që shkel drejtpërdrejt të drejtat themelore të punës në BE.
Fondacioni thotë se qëllimi i padisë është të kompensojë të gjithë lojtarët që kanë qenë të kufizuar në të ardhurat e tyre dhe të drejtën e tyre për lëvizje të lirë për shkak të rregullave kufizuese të FIFA-s.
Marrë nga BBC
