Tetë kompani aplikuan për tenderin për vazhdimin e ndërtimit të autostradës gjigande në Malin e Zi, ndër to edhe kompania kineze CRBC.
“Në tender ka aplikuar kompania CCC, kompania ombrellë ose siç quhet kompania mëmë CRBC. Por kush do të zgjidhet varet nëse i kanë plotësuar kërkesat. Është e mundur që e drejta për ndërtimin e seksionit të dytë të autostradës t’i jepet sërish CRBC-së kineze”, pohoi ministrja e Transportit Maja Vukiçevic. Deputetët e aleancës pro-serbe favorizojnë hapur kompanitë kineze në media. Së fundmi, duke folur për investimet nga Kina në Mal të Zi, deputeti i Demokracisë së Re Serbe, Dejan Gjurovic, tha se “investitorët potencialë kinezë për pjesën e dytë të autostradës mund të fitojnë garën, sepse janë dëshmuar se janë kontraktorë korrektë”.
Ajo kredi u mor prej ish qeverisë malazeze në kohën e presidentit Milo Gjukanovit në krye, pavarësisht kritikave për shkak të borxhit të lartë, jotransparencës së procesit të tenderit, korrupsionit të mundshëm dhe rrezikut që kinezët të përvetësonin pronën shtetërore si kolateral.
Seksioni i parë i autostradës u hap për trafik në vitin 2022, pas disa vonesave dhe rritjes së kostove të ndërtimit.
Ndërkohë pati aneksa të mëdha dhe në një raport të botuar në fillim të tetorit nga organizata joqeveritare amerikane, Forumi Ndërkombëtar për Studime Demokratike dhe Organizata joqeveritare malazeze MANS, që morën pjesë në zhvillimin e saj, thuhej se Kina ushtron ndikimin e saj në Mal të Zi kryesisht përmes ekonomisë, “shpesh duke përdorur korrupsionin midis elitave politike”.
