Përfaqësues të grupimit “Pensionistët Bashkë” njoftuan të martën para Ministrisë së Ekonomisë, Kulturës dhe Inovacionit se do të mbajnë një protestë për t’i ushtruar trysni qeverisë për rishikimin e nivelit të pensioneve.
Protesta do të mbahet ditën e mërkurë, datë 23 tetor, në orën 10:00 përpara Kryeministrisë.
Ata u shprehën të indinjuar për takimin që Kryeministri Edi Rama zhvilloi një ditë më parë, të hënën te Piramida.
Në këtë takim, Rama dhe ministrat e linjës, Blendi Gonxhja dhe Petrit Malaj u justifikuan për nivelin e përgjithshëm të pensioneve pavarësisht se pranuan se pensionistët janë kategoria që ka përfituar më pak nga zhvillimi ekonomik i vendit.
Për përfaqësuesit e grupimit “Pensionistët Bashkë”, takimi i së hënës ishte një tallje, dhe indeksimi prej 4.1% që u ka bërë qeveria është “një lëmoshë dhe jo rritje”.
“Ne përfaqësuesit e grupimit “Pensionistët Bashkë” jemi të indinjuar nga qëndrimi i qeverisë në lidhje me indeksimin e pensioneve. Shqipëria e sotme i ka të gjitha mundësitë për rritje të rëndësishme të pensioneve”, tha pensionisti Qani Shino duke i bërë thirrje gjithë pensionistëve t’i bashkohen protestën që ata kanë thirrur të mërkurën.
“Ju bëj thirrje gjithë njerëzimit të mos tremben më nga pushtetet, të vijnë dhe të protestojnë me ne”, tha më tej ai.
Vladimir Dyshniku u shpreh se indeksimi që bëri qeveria “ngjalli neveri tek të gjithë pensionistët”. “Koeficienti i turpshëm skandaloz 4.1%, ajo ishte një vjedhje skandaloze”, tha Vladimiri.
Të tjerë pensionsitë që morën pjesë në aksion u shprehën se situata e pensionistëve është alarmante dhe nuk ka asnjë arsye për të mos protestuar. Agim Vladi tha se merr 224 mijë lekë pension, i cili është i pamjaftueshëm dhe shumicën e tij e përdor për ilaçe.
“Protestën e nesërme e kemi thirr pasi pensionistët janë në një varfëri tepër të plotë. Unë marrë 224 mijë lekë, kam punuar në minierën e Bulqizës dhe është e pafalshme”, tha Agimi.
“Në asnjë vend të botës nuk ka ndodhur që pensionistët të marrin 60% të pagës dhe jo 70, ne nuk e gëzojmë këtë të drejtë. Jemi të diskriminuar”, u shpreh Besim Hoxha, një tjetër pensionist.
Shqipëria numëron afërisht 791 mijë pensionistë prej të cilëve rreth 92% e tyre përfitojnë pensione nga skema e detyrueshme e sigurimit shoqëror, invaliditetit apo pensionet familjare. 8% përfitojnë pensione nga programet e veçanta të trajtimit në kategoritë e ish-ushtarakëve, punonjësit e minierave, naftëtarëve etj.
Pensionistët kanë reaguar disa herë për indeksimin “qesharak” të pensioneve, duke e kundërshtuar atë.
Në një kohë kur kostoja e jetesës është rritur ndjeshëm dhe pensionet e tyre mesatare shkojnë te 15 mijë lekë në muaj.
Sipas indeksimit të qeverisë, pensionet në qytet rritem me rreth 752 lekë. Pensionistët me pension mesatar morën në tetor 18,993 lekë. Ndërsa një pensionist në fshat, mori 453 lekë më tepër.
“Ne nuk na u rritën pensionet po na u ulën, me të dëgjuar lajmin e indeksimit, dyqanet kanë rritur çmimet, tani nuk na del as për ushqimet bazike”, tha Qani Shino.
“Një paracetamol kushton 40 lekë, as kaq nuk na e ka rritur në ditë qeveria pensionin”, tha një tjetër pensionist.
Marrë nga Citizens.al
