Grupi Parlamentar i PD-së ka propozuar ndryshim në rregulloren e Kuvendit. PD kërkon që deputetët e Kuvendit të deklarojnë nëse kanë përdorur aplikacionet si Sky ECC dhe Encro Chat.
Ky “hap” i PD vjen pasi nga hetimet e SPAK ka rezultuar se në aplikacionin SKY ECC gjuha e dytë më e përdorur është shqipja. Kjo kërkesë vjen dhe pas zbardhjes së përgjimeve, ku tregonte lidhjet të ish-deputetit të PS Jurgis Çyrbja me personazhe të botës së krimit.
“Hetimet kanë zbardhur komunikimet e një deputeti të Partisë Socialiste me grupe dhe eksponentë të krimit të organizuar. Nga të dhënat e përftuara nga këto komunikime ka rezultuar se eksponentë të krimit të organizuar kanë ndërhyrë në strukturat drejtuese të Partisë Socialiste për të përcaktuar pozicionin e këtij deputeti në listën e kandidatëve të Partisë Socialiste dhe për të siguruar vota në bashkitë Durrës dhe Shijak, me qëllim zgjedhjen e tij.
Deputeti nga ana e tij ka siguruar të dhëna sekrete dhe ka ndërhyrë në organet e drejtësisë me qëllim favorizimin dhe moskapjen e eksponentëve të krimit të organizuar”, thuhet në relacionin shoqërues.
Po ashtu në kërkesë thuhet se pas këtij rasti janë ngritur pikëpyetje mbi integritetin, etikën dhe besueshmërinë jo vetëm të deputetëve, por edhe të vetë institucionit të Kuvendit të Shqipërisë.
“Këto dyshime ngrejnë pikëpyetje mbi integritetin, etikën dhe besueshmërinë jo vetëm të deputetëve, por edhe të vetë institucionit të Kuvendit të Shqipërisë, i cili ka për funksion themelor të sigurojë përfaqësimin dinjitoz të qytetarëve dhe një proces ligjbërës të udhëhequr nga interesi publik. Ekzistenca e komunikimeve në aplikacionet e enkriptuara, që dihet botërisht se përdoreshin nga grupet kriminale, me qëllim ushtrimin e aktiviteteve të paligjshme, dëmton rëndë reputacionin dhe kredibilitetin e deputetëve dhe Kuvendit të Shqipërisë”, thuhet ndër të tjera në relacion.
