Ndërsa hetimet e SPAK për inceneratorin e Tiranës nuk përfundojnë kurrë dhe janë copëzuar në dhjetra fraksione, duket se zhvillime intensive ka dhe në krahun administrativ. Brenda një periudhe më pak se një muaj, drejtoresha e Agjencisë së Administrimit të Pasurive të Sekuestruara, Risena Xhaja, ka nxjerrë dy urdhra që ndryshojnë manaxhimin e inceneratorit të sekuestruar.
Fillimisht, Xhaja e sapoemëruar, kufizoi kompetencat e administratorit të caktuar nga shteti Arjan Baci, duke i lënë atij vetëm përgjegjësinë e marrëdhënieve me prokurorinë. Ndërsa për drejtimin e përditshëm të kompanisë, Xhaja emëroi një administrator të dytë, ish-drejtorin e tatimeve në Elbasan, Indrit Karaj.
Por vetëm pak javë pas këtij urdhri, Xhaja ka nxjerrë një urdhër të dytë. Këtë herë duke shkarkuar përfundimisht Arjan Bacin, administratorin shtetëror që ka qenë në krye të inceneratorit që në momentin që ai u sekuestrua nga SPAK verën e vitit të kaluar dhe duke e lënë biznesin tërësisht nën menaxhimin e Indrit Karajt.
Luftë për miliardat e dherave
Ndryshimi i administratorit shtetëror të inceneratorit nuk është një veprim rutin burokratik. Më parë, nën rrogoz është zhvilluar një luftë e fortë për të marrë administrimin e kompanisë. Arsyeja është sepse paratë tek inceneratori vazhdojnë lumë. Jo vetëm ato që paguhen nga buxheti i shtetit për depozitimin e mbetjeve, por edhe paratë e ndërtuesve për dherat.
Ky është një biznes i madh, ku të gjithë duan të fusin duart. Jo më kot, që nga momenti kur inceneratori u sekuestrua nga SPAK, Agjencia e Administrimit të Pasurive të Sekuestruara ka qenë nën presion të vazhdueshëm.
Jo vetëm nga grupi privat që e zotëronte këtë koncesion, por edhe nga ndërhyrjet të figurave të fuqishme me pushtet politik. Këto presione u denoncuan dhe në media, por ajo që ndodhi më pas ishte shkarkimi i kreut të Agjencisë së Administrimit të Pasurive të Sekuestruara, Ardian Koni. Nën zë flitet se arsyet e largimit të Konit lidhen pikërisht me inceneratorin e Tiranës.
Tashmë në krye të Agjencisë gjendet Risena Xhaja, e cila nuk duroi më shumë se një muaj për të futur duart. Dhe ndërsa SPAK tjerr hetimet e inceneratorit të Tiranës, duket se mbi biznesin e majmë të koncesionit po shtrihen sërish duart e gjata. Vetëm biznesi i dherave sjell miliona euro në vit dhe mjafton të kesh fuqinë për të vendosur se sa kamionë regjistrohen dhe sa jo.
Marrë nga Kapitali.al
