Të paktën 19 persona kanë mbetur të vdekur në një sulm në pallatin presidencial të Çadit, ka njoftuar media shtetërore të enjten.
Sulmi të mërkurën mbrëma ndodhi ndërsa presidenti i Çadit, Mahamat Deby Itno ishte brenda pallatit, por autoritetet thanë se situata u vu shpejt nën kontroll.
“Situata është plotësisht nën kontroll. Nuk ka frikë”, ka thënë ministri i Punëve të Jashtme, Abderaman Koulamallah ndërsa ishte i rrethuar nga ushtarë, në një transmetim të drejtpërdrejtë në Facebook të filmuar brenda pallatit presidencial të mërkurën vonë.
Sulmi ndodhi rreth një javë pasi kombi afrikan mbajti zgjedhje parlamentare që supozohej të ndihmonin në rivendosjen e demokracisë, por partia kryesore e opozitës bojkotoi zgjedhjet. Rezultatet nuk janë shpallur ende dhe analistët kanë thënë se presin që zgjedhjet të ndihmojnë Deby Itno të konsolidojë kontrollin e tij në pushtet.
Deby Itno mori pushtetin si një sundimtar ushtarak pasi babai i tij, i cili kaloi tri9 dekada duke udhëhequr vendin, u vra duke luftuar kundër rebelëve në vitin 2021.
Deby Itno fitoi zgjedhjet presidenciale vitin e kaluar teksa vëzhguesit ndërkombëtarë kanë thënë se ato nuk ishin të besueshme.
Marrë nga Associated Press
