Sistemi TIMS, i cili është dokumenti i hyrje-daljeve nga territori i Republikës së Shqipërisë, ka qenë objekt i sulmeve si kibernetike ashtu edhe atyre politike. Madje, u hap edhe një komision hetimor për abuzimet e zyrtarëve të Policisë së Shtetit dhe Ministrisë së Brendshme, i kërkuar nga opozita.
Kjo e fundit synonte që t’i jepte përgjigje pyetjeve mbi ndërhyrjet e paligjshme në këtë sistem. Opozita kishte dyshime se ndërhyrjet ishin bërë për llogari të grupeve kriminale, ndërsa kërkuan që të hetoheshin si dolën të dhënat e hyrje-daljeve nga Shqipëria.
Por, siç ndodh rëndom në të gjitha komisionet e ngritura, të gjithë deputetët apo edhe ata që japin dëshmi, veçse sa bëjnë “zhurmë” dhe në fund asnjë konkluzion. Të dhënat përdoren për politikë, pa u futur në thelb se si ndodhi kjo ndërhyrje.
Por, le t’i marrim me radhë. Në muajin nëntor 2024, Agjencia Kombëtare e Shoqërisë së Informacionit finalizoi një tender për sistemin TIMS. Fituese doli firma “COMMUNICATION PROGRESS”.
Objekti i tenderit ishte “përmirësimi i sistemit TIMS dhe modulit të kontrollit kufitar” për Drejtorinë e Përgjithshme të Policisë së Shtetit”, me fondet e Buxhetit të Shtetit, por me fondet e parashikuara nga vetë institucioni përfitues Policia e Shtetit. Fondi limit i tenderit ishte 157 milionë lekë.
Por, lexoni me kujdes kohëzgjatjen. Në dokumente shkruhet se është “9 muaj implementim dhe 24 muaj”. Në tender mori pjesë vetëm një firmë, “COMMUNICATION PROGRESS”, e cila ofroi 148.800.000 milionë lekë, ose rreth 1.5 milionë euro.
Kontrata e muajit nëntor parashikonte ndërhyrje, teksa në dokumente shkruhej se teknologjia e vjetër është e ndjeshme ndaj kohës, duke e bërë raportimin dhe monitorimin e kalimit të kufirit më të vështirë dhe më të ngadaltë. “Sistemi TIMS nuk ka aplikuar përditësimet e fundit te teknologjisë dhe sigurisë, duke ndikuar ne rritjen e nivelit te riskut lidhur me sigurinë. Rregullore të reja dhe ndryshime ligjore kane ndikuar në papërputhshmërinë e sistemit me kërkesat dhe standardet e tanishme, si rezultat i pamundësisë teknike për përditësime të sistemit për shkak të teknologjisë së vjetër” thuhet në dokumente.
Nëse tenderi i nëntorit do të implementohej për 33 muaj, përse u desh një tender i dytë? Sipas dokumenteve që disponon VoxNews, Policia e Shtetit publikoi në Agjencinë e Prokurimit publik një njoftim për një tender të ri. Objekti është “përmirësimi i sistemit TIMS dhe modulit të kontrollit kufitar”. Kësaj herë institucioni që bëri tenderin është Policia e Shtetit. Fondi i dhënë është plot 750 mijë euro.
Pra, për disa muaj, shteti shqiptar ka shpenzuar rreth 2.3 milionë euro për përmirësimin e sistemit TIMS. Por, ajo që “bie erë” në gjithë këtë histori është se, tenderët bëhen të ndarë. Njëherë AKSHI dhe njëherë Policia e Shtetit. Nëse afati është për mbi 2 vjet, përse bëhet tender i ri? A mos kërkon policia që ta ketë nën kontroll sërish dhe ta përdorë? Dyshimet janë të mëdha, pasi me këto lëvizje policia veçse konfirmon se sistemi i duhet më shumë jashtë pune sesa në punë. Madje, me një siguri minimale.
Marrë nga VoxNews.al
