Presidenti francez Emmanuel Macron ka telefonuar kryeministrin izraelit Benjamin Netanyahu për t’u ankuar për ndërhyrjen “e papranueshme” në zgjedhjet e fundit të Francës nga një prej ministrave të tij, ka raportuar Axios.
Duke folur për transmetuesin izraelit “Kan” në fillim të këtij muaji, Ministri izraelit i Çështjeve të Diasporës Amichai Chikli shprehu mbështetjen për partinë Tubimi Kombëtar të Marine Le Pen, aktualisht e udhëhequr nga Jordan Bardella.
“Do të ishte e shkëlqyer për Izraelin nëse [Le Pen] do të ishte presidente e Francës. Sipas mendimit tim, do të ishte mirë për shtetin e Izraelit”, tha Chikli.
I pyetur nëse Netanyahu ishte dakord, Chikli u përgjigj : “Unë mendoj se Netanyahu dhe unë ndajmë të njëjtin mendim”.
Intervista u zhvillua katër ditë para zgjedhjeve parlamentare në Francë, në të cilat blloku centrist i Macron u detyrua të hynte në një partneritet de-facto me të majtët, të gjelbërit dhe komunistët për të parandaluar që Tubimi Kombëtar të fitonte një shumicë të plotë.
Një ditë pas intervistës së Chiklit, Macron telefonoi Netanyahun për t’u ankuar se komentet e ministrit ishin “të papranueshme” dhe përbënin ndërhyrje në zgjedhje. Ky lajm është bërë me dije të martën nga reporteri i “Axios”, Barak Ravid.
Netanyahu e siguroi Macronin se ai kishte udhëzuar të gjithë ministrat e tij që të përmbaheshin nga komentimi i zgjedhjeve në Francë. Zyra e Netanyahut dhe ambasada franceze në Izrael refuzuan të komentojnë mbi këtë çështje.
