Bashkia Sarandë ka hapur një tender që rrezikon të hyjë në librat e rekordeve Guiness si një nga tenderat më të çuditshëm të zhvilluar ndonjë herë përsa i përket objektit të tij. Bashkia ka vendosur në dispozicion një fond limit prej 18,300 Euro për “Blerje rërë për plazhet publike”.
Ekofin.al konsultoi të gjithë dokumentet e tenderit dhe aty nuk specifikohet se cilat do të jenë plazhet publike, ku do të përdoret kjo rërë.
Kërkesa kryesore për operatorët që do të hyjnë në garë për të paraqitur ofertat e tyre është se duhet të kenë në pronësi ose me qera noteriale 1 mjet transporti mallrash me kapacitet jo më pak se 10 m3, gjë që mund të plotësohet lehtësisht nga shumë ofertues.
Gjithashtu, saktësohet se kërkohet rërë lumi, e përbërë nga grimca të forta dhe të pastra, të qarta në ngjyrë dhe në formë sferike. Rëra duhet të jetë e pastër dhe pa substanca organike, baltë, apo papastërti të tjera. Përbërja e granulimit të rërës duhet të jetë me një granulim nga 1 mm deri në 7 mm.
Pyetja kryesore që lind, është përse Ndërmarrja e Shërbimeve Publike në Bashkinë Sarandë duhet të hapë një procedurë tenderi me vlerë 18,300 Euro për të kërkuar një subjekt privat që praktikisht të shkojë te lumi, të marrë 710 m3 rërë që kërkohet në kontratë, (si ta kishte rërën e lumit pronë të vetën) dhe pastaj thjesht ta transportojë dhe t’ia dorëzojë Ndërmarrjes së Shërbimeve Publike të Bashkisë Sarandë? Pra, pse duhet të paguash një subjekt privat për të marrë rërën e lumit, kur këtë mund ta bësh vetë?
Marrë na Ekofin.al
