Kur bëhet fjalë për të bërë histori të futbollit, Reali i Madridit është aty gjithmonë. Por këtë herë nuk bëhet fjalë për arritje sportive. Reali bëhet klubi i parë që arrin dhe tejkalon një miliard euro të ardhura në një sezon. “Të ardhurat për sezonin 2023-24, duke përjashtuar transferimet e lojtarëve, arrijnë në 1,073 miliardë euro, 27% më shumë se një vit më parë”, bën të ditur klubi i Florentino Perezit nëpërmjet njoftimit zyrtar për shtypin, duke shtuar: “Reali i Madridit ka një fitim prej 16 milionë euro në vitin financiar 2023-24. Klubi mban një pozicion të fortë financiar me një vlerë neto prej 574 milionë eurosh.”
Ajo që është mbresëlënëse, në fakt, është se “Los Blancos” kanë thyer tavanin prej një miliard eurosh pa llogaritur transferimin e lojtarëve. Duke tejkaluar shifrën e sezonit të kaluar për sa i përket të ardhurave me 27%.
“Në fushën sportive, ekipi i parë i futbollit fitoi titullin e Ligës së Kampionëve – njofton klubi spanjoll – i gjashti në periudhën 2014-2024, krahas titujve të La Ligas dhe Superkupës së Spanjës. Për sa i përket ekipit të parë të basketbollit, fitoi titujt e Ligës, Kupës së Mbretit dhe Superkupës së Spanjës dhe ishte finalist në Euroligë”.
Performanca madhështore e klubit të Florentino Perezit, duke përfshirë edhe rezultatet sportive e jo vetëm, e bënë të mundur këtë arritje historike. Mirëpo, ashtu si të ardhurat, dolën edhe shpenzimet, ndaj dhe fitimi i realizuar nga Reali i Madridit është pozitiv, pra, tejkalon shpenzimet.
