Drejtorisë e Hetimit të Krimit Kibernetik ka paralajmëruar qytetarët shqiptarë lidhur me raste të mashtrimeve kibernetike për kredi të rreme.
“Janë evidentuar raste kur persona të panjohur, përmes faqeve të dyshimta në internet, rrjeteve sociale apo mesazheve elektronike, paraqiten si përfaqësues të institucioneve financiare dhe i nxisin qytetarët të aplikojnë online për kredi, me qëllim përfitimin monetar në mënyrë mashtruese”, shkruan lajmërimi i Policisë së Shtetit.
Njoftimi thekson se këto oferta janë mashtruese dhe qytetarët nuk duhet të bien pre e tyre, pasi rrezikojnë të dhënat personale dhe financiare.
“Të tregojnë kujdes të shtuar dhe të mos dërgojnë para, të dhëna bankare apo dokumente personale te persona të paidentifikuar apo faqe interneti të pasigurta”, paralajmëron njoftimi i policisë.
Policia inkurajon qytetarët që për veprime bankare të përdorin vetëm kontaktet zyrtare të bankave përkatëse, ose në rastet kur kanë mundësi të paraqiten vetë fizikisht pranë degëve bankare.
Marrë nga Reporter.al
