Autoriteti i Konkurrencës ka vendosur të hetojë diferenca e madhe të çmimeve të frutave dhe perimeve nga fermeri te grumbulluese e më pas te konsumatori.
“Referuar strukturës së tregut, integrimit vertikal, sjelljes së ndërmarrjeve grumbulluese dhe diferencave të mëdha në zinxhirin e vlerës së produktit nga prodhuesit, grumbulluesit, shitësit me shumicë deri tek konsumatori fundor, mund të jemi para një sjelljeje anti-konkurruese si pasojë e marrëveshjeve dhe/ose praktikave të bashkërenduara ndërmjet dy ose më shumë ndërmarrjeve që operojnë në tregun e grumbullimit dhe shitjes me shumicë të fruta-perimeve,” thuhet në vendimin e AK. “
Konkurrenca” njofton se është hapur hetim paraprak për tregjet me shumicë të frutave dhe perimeve në pesë qarqe, Tiranë, Elbasan, Berat, Fier dhe Korçë.
Nga vëzhgimi i A2 CNN rreth dy vite e gjysmë më parë, rezultoi se një pjesë e konsiderueshme e prodhimit të Myzeqesë shkonte pikërisht në tregun agro-ushqimor të Tiranës me një diferencë 80-100 lekë më tepër nga sa fermeri e shiste.
Sipas Autoritetit të Konkurrencës, janë 86 ndërmarrje të grumbullimit dhe tregtimit me shumicë të frutave dhe perimeve në qarqet Tiranë, Elbasan, Berat, Fier dhe Korçë, që kanë abuzuar me çmimet e produkteve bujqësore.
Në të gjitha qarqet, është konstatuar se pikat e grumbullimit operonin pa kontratë, duke bërë që fermerët t’i shesin produktet e tyre nën kosto, duke ju shkaktuar humbje.
