Skuadra jonë kombëtare përgatitet për një nga ndeshjet më historike në historinë e saj: gjysmëfinalen e “Play Off”-it për Botërorin kundër Polonisë, që nis në orën 20:45 në Varshavë. Për herë të parë, Shqipëria ka arritur në një tur kaq të avancuar, dhe për të shkruar histori, çdo lojtar duhet të japë maksimumin.
Trajneri Sylvinho ka pasur tri ditë për të përgatitur skuadrën dhe pritet të bëjë disa surpriza në formacion, sidomos në repartin e sulmit, ku mungesat janë më të ndjeshme.
Porta i besohet sërish Thomas Strakoshës, i cili do të ketë para 4 mbrojtës: në të majtë Mario Mitaj, në të djathtë Elseid Hysaj, ndërsa qendërmbrojtja mbetet nën kujdesin e Berat Gjimshitit dhe Arlind Ajetit. Një nga mbrojtësit më në formë, Ardian Ismajli, do të nisë sërish nga stoli.
Në mesfushë, titullarë të padiskutueshëm janë Asllani dhe Shehu, ndërsa balotazhi mes Ramadanit dhe Laçit duket se do të favorizojë këtë të fundit.
Në sulm, formacioni parashikon Myrto Uzunin në të djathtë dhe Arbër Hoxha në të majtë, ndërsa në qendër do të luajë Bajrami si numër 9 fals. Gjatë ndeshjes, Bajrami mund të zhvendoset në krah, duke lënë qendrën për Uzunin, për të krijuar lëvizje të papritura dhe hapësira për ofensivën kuqezinjve.
Duket se forma e Brojës e ka detyruar Sylvinho-n ta mbajë në stol sulmuesin e Burnley-t, ndërsa dy lojtarët sulmues më në formë për momentin, Arnest Muçi dhe Anis Mehmeti do të jenë ‘asat nën mëngë’ të trajnerit brazilian.
Marrë nga Syri TV
