Presidenti amerikan Donald Trump paralajmëroi Iranin për një përshkallëzim të menjëhershëm ushtarak, duke deklaruar se SHBA mund ta “shtypë” vendin brenda një nate, nëse nuk ka një marrëveshje për paqe.
Trump bëri të ditur se operacioni i shpëtimit përfshiu rreth 200 trupa dhe dhjetëra avionë, duke e cilësuar atë si një ndërhyrje komplekse dhe të rrezikshme. Ai theksoi se helikopterët amerikanë fluturuan shumë ulët dhe u përballën me zjarr intensiv nga forcat iraniane, por misioni përfundoi pa viktima në radhët e ushtarëve amerikanë.
Sipas tij, disa avionë ushtarakë u humbën gjatë operacionit, ndërsa avionët C-130 Hercules u shkatërruan qëllimisht për të mos rënë në duart e Iranit. Për shkak të terrenit të papërshtatshëm, u përdorën avionë më të vegjël për të realizuar evakuimin.
Presidenti amerikan paralajmëroi se bombardimet do të intensifikohen në ditët në vijim. Në të njëjtën linjë, Sekretari i Mbrojtjes Pete Hegseth deklaroi se “do të ketë më shumë bombardime se në çdo moment tjetër të luftës”, duke lënë të kuptohet për një ofensivë të gjerë ushtarake.
Kreu i CIA, John Ratcliffe, konfirmoi se agjencia përdori “aftësi unike dhe sekrete” për të lokalizuar dhe shpëtuar pilotin, duke theksuar se operacioni u realizua përpara se autoritetet iraniane ta zbulonin vendndodhjen e tij.
Trump kritikoi ashpër rrjedhjen e informacionit për operacionin, duke thënë se publikimi i detajeve rrezikoi jetën e ushtarëve amerikanë. Nga ana tjetër, Hegseth akuzoi Iranin për dështim, duke deklaruar se autoritetet në Teheran “duhet të turpërohen” për paaftësinë e tyre për të parandaluar operacionin amerikan.
Deklaratat e forta nga zyrtarët amerikanë vijnë në një moment tensionesh të larta në rajon, duke rritur frikën për një përshkallëzim të mëtejshëm të konfliktit mes Shtetet e Bashkuara dhe Iran.
Marrë nga Associated Press
