Gazeta zvicerane Aargauer Zeitung i ka kushtuar një artikull përplasjes së grupeve kriminale shqiptare, duke theksuar se konflikti ka kaluar kufijtë dhe ka prekur edhe Zvicrën.
Sipas shkrimit, autoritetet zvicerane kanë ekstraduar drejt Shqipërisë një shtetas shqiptar të dyshuar për përfshirje në trafik droge dhe në një komplot për vrasje, në kuadër të një përplasjeje të dhunshme mes klaneve. Rasti, sipas gazetës, përmban edhe elementë me ndjeshmëri politike.
Bëhet fjalë për 37-vjeçarin Jozi Kraja, i cili ndodhej në Zvicër dhe po vuante një dënim në kantonin Solothurn për vepra si pastrimi i parave, trafiku i drogës dhe shkelje të ligjit për armët. Në mars të vitit 2025, Federal Office of Justice Switzerland miratoi ekstradimin e tij, pavarësisht kundërshtimeve nga ana e të dyshuarit.
Kraja kishte pretenduar se jeta e tij do të ishte në rrezik në Shqipëri dhe kishte shprehur mosbesim ndaj institucioneve shqiptare, duke e cilësuar kërkesën për ekstradim si të motivuar politikisht. Ai akuzohet në Shqipëri për përfshirje në një organizatë kriminale.
Sipas medias zvicerane, hetimet shqiptare sugjerojnë se ai ka qenë pjesë e një grupi prej 16 personash, të cilët në vitin 2020 dyshohet se morën përsipër eliminimin e dy vëllezërve rivalë. Ky plan, sipas autoriteteve, lidhet me interesat e një deputeti të Partisë Socialiste, i cili dyshohet se kërkonte hakmarrje për vrasjen e një familjari.
Në gjykatë, Kraja ka mohuar çdo përfshirje në atentat, duke paraqitur një alibi se gjatë asaj periudhe kishte qëndruar për 40 ditë në banesën e nënës së tij, në kuadër të ritualeve mortore. Megjithatë, kjo dëshmi nuk është konsideruar bindëse nga gjykata zvicerane, e cila rrëzoi ankesën e tij dhe vendosi edhe një tarifë gjyqësore prej 3 mijë frangash.
Pas përfundimit të procedurave, ai është ekstraduar në Shqipëri, ku pritet të përballet me drejtësinë së bashku me disa të pandehur të tjerë. Për të, ashtu si për të gjithë të akuzuarit, zbatohet prezumimi i pafajësisë.
Marrë nga Droni.al
