Aeroportet europiane përballen me një rrezik real për mungesë të karburantit për avionë në javët në vijim, nëse Ngushtica e Hormuzit nuk rikthehet plotësisht në funksion.
Paralajmërimi vjen nga ACI Europe, organizata që përfaqëson aeroportet e Bashkimit Europian, e cila thekson se rezervat janë në rënie dhe tensionet ushtarake po ndikojnë drejtpërdrejt në furnizim.
Në një letër drejtuar komisionerit europian për transportin, Apostolos Tzitzikostas, organizata kërkon ndërhyrje të menjëhershme dhe koordinim në nivel të BE-së për të shmangur përkeqësimin e situatës. Sipas ACI Europe, nëse kriza zgjatet, mungesa e karburantit mund të kthehet në një problem sistemik që rrezikon funksionimin normal të aviacionit në Europë, pikërisht në prag të sezonit veror kur kërkesa për udhëtime rritet ndjeshëm.
Ndërkohë, disa vende aziatike si Vietnami kanë nisur tashmë masa për racionimin e karburantit. Në Europë nuk raportohen ende mungesa të përhapura, por çmimet janë rritur ndjeshëm.
Në Europën veriperëndimore, çmimi i karburantit për avionë ka arritur në 1,573 dollarë për ton, pothuajse dyfish krahasuar me periudhën para konfliktit me Iranin.
Edhe pse është njoftuar një armëpushim dyjavor nga Donald Trump, tregjet globale të energjisë mbeten të tensionuara dhe çmimet e naftës vijojnë të qëndrojnë në nivele të larta.
Përballë kësaj situate, linjat ajrore kanë nisur të marrin masa për të përballuar kostot në rritje. Delta Air Lines ka paralajmëruar ulje të kapacitetit me 3.5%, ndërsa Air New Zealand dhe LOT Polish Airlines kanë reduktuar fluturime dhe po shqyrtojnë rritje të çmimeve të biletave.
Marrë nga Skyweb.al
