Shqipëria renditet më dobët se vendet e tjera të Ballkanit për sa i përket lirisë në internet, me një pikëzim prej 64/100, dukshëm më i ulët se Kosova, Mali i Zi dhe Maqedonia e Veriut, të cilat shënojnë secila nga 84 pikë. Kjo e vendos Shqipërinë në të njëjtin nivel me vende si SHBA, ndërsa fqinjët rajonalë afrohen me standardet e vendeve më të lira në Evropë.
Në nivel global, të dhënat tregojnë një ndarje të thellë mes vendeve me internet të lirë dhe atyre me kufizime të forta. Një total prej 11 shtetesh ndajnë vendin e parë me 92 pikë, duke përfshirë vende nga Evropa, Amerika Latine dhe Azia si Norvegjia, Danimarka dhe Zelanda e Re.
Në anën tjetër të renditjes, Koreja e Veriut mbetet vendi me internetin më të kufizuar në botë me 0 pikë, ndërsa Kina, Rusia, Irani dhe Pakistani renditen menjëherë pas me vetëm 4 pikë.
Indeksi, i publikuar për vitin 2026 nga Cloudwards dhe i përpunuar nga Visual Capitalist, analizon 171 vende dhe mat lirinë në internet bazuar në katër tregues kryesorë: përdorimin e torrentëve, aksesin në VPN, përmbajtjen për të rritur dhe lirinë e shprehjes politike dhe qytetare online.
Shtetet e Bashkuara rezultojnë në mes të renditjes globale me 64 pikë, në të njëjtin nivel me Shqipërinë, ndërsa Mbretëria e Bashkuar renditet më poshtë me 52 pikë, për shkak të rregullimeve më të ashpra për përmbajtjen online.
Në përgjithësi, Evropa dhe Amerika Latine dominojnë listën e vendeve me internet më të lirë, ndërsa sistemet më të kufizuara mbeten të përqendruara në vende me kontroll të fortë shtetëror mbi informacionin dhe platformat digjitale.
Marrë nga Ekofin.al
