Situata brenda Partisë Socialiste duket e tensionuar, pasi gjatë mbledhjes së Grupit Parlamentar, kryeministri Edi Rama paralajmëroi përjashtimin e deputetes Elisa Spiropali nga grupi, për shkak të qëndrimeve dhe postimeve të saj në rrjetet sociale.
Sipas mediave, Rama gjatë mbledhjes është ndalur disa minuta tek Spiropali, duke përmendur mungesat e saj në votime dhe reagimet publike në rrjetet sociale.
“Herën e parë nuk erdhe në votim. Herën e dytë bëre çarçafin (i referohet postimit në Facebook) dhe herën e tretë nuk ka, del jashtë këtij grupi,” ka thënë Rama, duke e paralajmëruar për përjashtim nga Grupi Parlamentar.
Kryeministri gjithashtu theksoi se në parti “nuk mund të krijohen drama”.
“Tek puna e partisë nuk mund të bëni drama, dhe për këtë po të drejtohem ty, Elisa. Nuk dua të krijohen situata brenda partisë. Partia ka dy ngjyra, bardhë dhe zi. Ose bardhë dhe me ne, ose zi dhe përballë nesh.”, tha kryeministri.
Më tej, Rama shtoi se paralajmërimi lidhej me postimet e Spiropalit në rrjetet sociale. Raportohet gjithashtu se Spiropali ka kërkuar të marrë fjalën, por nuk është lejuar.
“Ti s’mund të replikosh këtu, ti nuk merr fjalë më. Me ty është investuar PS dhe unë,” i është drejtuar kryeministri ish-ministres së Jashtme.
Marrë nga Newsbomb.al
