Anëtari i Këshillit Bashkiak të Tiranës, Jonathan Pano, ka ngritur një shqetësim për gjendjen e ambienteve në Universitetin e Mjekësisë. Ai ka ndarë një foto dhe një reagim në rrjetet sociale, ku denoncon kushtet e papranueshme në sallat e mësimit, duke i cilësuar si të turpshme për një institucion që formon mjekët e ardhshëm të vendit.
Në reagimin e tij, Pano kritikon kontradiktën mes detyrimit ligjor që studentët të punojnë për disa vite në Shqipëri pas diplomimit dhe kushteve të mësimit që ai i përshkruan si skandaloze. Sipas tij, shteti nuk mund të kërkojë angazhim nga të rinjtë, ndërkohë që nuk u ofron as respektin minimal përmes ambienteve të denja për studim.
Postimi i plotë:
Kjo foto nuk është magazinë e braktisur. Është sallë mësimi në Universitetin e Mjekësisë.
Mure të kalbura, lagështi, suva e rënë, myk në ambient ku duhet të formohen mjekët e ardhshëm të Shqipërisë.
Dhe ironia më e madhe është kjo:
Studentëve u thuhet: “Do firmosësh kontratë me shtetin, do punosh këtu pas diplomimit, ose paguaj tarifën e plotë.” Ligji parashikon deri në 3 vite shërbim të detyrueshëm pas diplomimit.
Pra shteti u thotë:
“S’ke ku shkon, ke kontratë me ne.”
Po ky shtet nuk arrin as t’u sigurojë një sallë normale mësimi pa lagështi e pa myk.
Kjo është mungesë respekti për studentët, për arsimin publik dhe për mjekët që nesër do të kujdesen për ne.
Nuk mund t’i mbash të rinjtë me detyrim, ndërkohë që i trajton në kushte skandaloze.
Para se t’u kërkoni të rinjve të qëndrojnë në Shqipëri, bëjeni Shqipërinë një vend ku ia vlen të qëndrohet.
Marrë nga Newsbomb.al
