Një valë ekstreme e të nxehtit ka përfshirë Evropën Perëndimore, duke thyer rekorde temperaturash në Francë dhe Britaninë e Madhe dhe duke ngritur alarmin për pasojat e krizës klimatike.
Sipas tij, shkenca është e qartë se ndryshimet klimatike të shkaktuara nga aktiviteti njerëzor po i bëjnë valët e të nxehtit gjithnjë e më të shpeshta dhe më intensive. Stiell theksoi se mbrojtja e jetëve dhe ekonomive nga temperaturat ekstreme duhet të nisë me reduktimin e varësisë nga lëndët djegëse fosile dhe kalimin drejt energjive të pastra.
Në Britaninë e Madhe, Zyra Meteorologjike regjistroi temperaturën 35.1 gradë Celsius në Kew Gardens të Londrës, duke thyer për të dytën ditë radhazi rekordin kombëtar për muajin maj. Temperatura tejkaloi rekordin historik prej 32.8 gradësh të vendosur në vitin 1922 dhe të barazuar në vitin 1944. Nxehtësia e fortë krijoi kushte të vështira edhe në metronë e Londrës, ku shumë qytetarë u përballën me temperatura mbytëse.
Edhe Franca po përjeton temperatura të pazakonta për këtë periudhë të vitit. Shërbimi meteorologjik francez Météo-France raportoi se një “kupolë nxehtësie” ka bllokuar ajrin e nxehtë mbi vend, duke sjellë temperatura deri në 13 gradë më të larta se normalja sezonale. Autoritetet vendosën alarm portokalli për temperatura të larta në 17 departamente, përfshirë Parisin, ndërsa dhjetëra zona të tjera janë në paralajmërim të verdhë.
Në Spanjë, temperaturat pritet të arrijnë deri në 40 gradë Celsius gjatë javës. Agjencia shtetërore meteorologjike Aemet tha se temperaturat aktuale janë tipike për muajin korrik dhe jo për fundin e majit. Alarm portokalli është lëshuar edhe për rajonin e Vendit Bask, ndërsa disa qytete jugore pritet të regjistrojnë temperatura mbi 38 gradë.
Ekspertët paralajmërojnë se ngjarje të tilla ekstreme po ndodhin gjithnjë e më shpesh për shkak të ngrohjes globale. Peter Thorne, drejtor i kërkimit klimatik në Universitetin Maynooth në Irlandë, deklaroi se rekordet e fundit në Britani dhe Francë janë “marramendëse” dhe një tregues i qartë i ndikimit të gazrave serrë në klimën globale.
Temperaturat e larta kanë shkaktuar edhe viktima. Autoritetet franceze raportuan të paktën shtatë vdekje të lidhura drejtpërdrejt ose tërthorazi me vapën ekstreme, ndërsa në Angli katër adoleshentë kanë humbur jetën nga mbytja që prej fundjavës, teksa shumë qytetarë kërkojnë freskim në zona ujore.
Ndërkohë, paralajmërimet meteorologjike vijojnë në disa vende të Evropës, ndërsa shkencëtarët theksojnë se valë të tilla të nxehti, që dikur ndodhnin vetëm në kulmin e verës, po shfaqen gjithnjë e më herët dhe po bëhen më të rrezikshme për popullsinë.
Marrë nga BBC
