Lëvizja Vetëvendosje ka shënuar rritje të ndjeshme të rezultatit pas nisjes së numërimit të votave të diasporës, duke siguruar deri më tani katër mandate më shumë krahasuar me rezultatet preliminare të publikuara pas zgjedhjeve të 7 qershorit.
Sipas rezultateve të përditësuara, Vetëvendosje ka arritur në 45.89 për qind të votave në nivel vendi dhe aktualisht ka 52 ulëse në Kuvendin e Kosovës. Në rezultatet preliminare, partia e Albin Kurtit kishte siguruar 42.96 për qind të votave, që përkthehej në 48 mandate parlamentare.
Nga ana tjetër, Partia Demokratike e Kosovës ka rënë në 19.96 për qind të votave dhe aktualisht ka 22 mandate në Kuvend. Lidhja Demokratike e Kosovës mbetet forca e tretë politike me 17.04 për qind dhe 19 ulëse, ndërsa Aleanca për Ardhmërinë e Kosovës ka 6.89 për qind dhe 7 mandate.
Megjithëse janë numëruar mbi 22 mijë vota nga përfaqësitë diplomatike dhe dhjetëra mijëra vota me postë, procesi ende nuk ka përfunduar. Për t’u numëruar kanë mbetur edhe rreth 35 mijë zarfe me vota nga diaspora, si dhe rreth 11 mijë vota me kusht dhe të personave me nevoja të veçanta.
Sipas trendit aktual, ndryshime të mëdha në ndarjen e mandateve duken më pak të mundshme, megjithëse rezultati përfundimtar do të varet nga votat që kanë mbetur pa u numëruar.
Mandatet në Kuvendin e Kosovës ndahen sipas formulës D’Hondt. Për formimin e Qeverisë së re nevojiten të paktën 61 vota në Kuvend, ndërsa për zgjedhjen e presidentit kërkohet kuorum prej 80 deputetësh në dy rundet e para të votimit.
Marrë nga Albinfo.ch
