Revista e madhe gjermane, ‘Spiegel’, shkruan se protestat në Shqipëri po e çojnë qeverinë e Edi Ramës drejt rrëzimit. Revista thekson se tashmë nuk bëhet fjalë për resorin e familjes Trump, por protestuesit po kërkojnë dorëheqjen e Edi Ramës.
“Sipas portalit Politico, vetëm të shtunën në Tiranë protestuan rreth 100.000 deri në 200.000 njerëz. “Shqipëria nuk është në shitje”, brohorisnin ata. Ishte protesta më e madhe deri tani.
Sazani ndodhet brenda një parku kombëtar detar dhe strehon florë dhe faunë të veçantë. Më shumë se 200 lloje jetojnë në lagunë dhe ajo përbën një zonë të rëndësishme pushimi për zogjtë shtegtarë, veçanërisht për flamingot. Këto shpendë janë bërë ndërkohë simboli i protestave; vendi i shqiponjës po shndërrohet në vendin e flamingove.
Hera e fundit kur kaq shumë njerëz dolën në rrugët e Tiranës ishte në fillim të viteve 1990. Atëherë po shpërbëhej Jugosllavia. Por tani nuk bëhet më fjalë vetëm për resortin e familjes Trump: protestuesit po kërkojnë dorëheqjen e kryeministrit shqiptar Edi Rama,” shkruan revista.
Më tej ajo thekson se arsyeja kryesore e protestave është shpopullimi masiv.
“Në të njëjtën kohë, vendi po përballet me një krizë demografike. Shumë të rinj po largohen në kërkim të arsimit, punës dhe perspektivës më të mirë. Sipas statistikave zyrtare, që nga viti 2015 popullsia është zvogëluar me rreth gjysmë milioni banorë. OKB-ja vlerëson se aktualisht Shqipëria ka rreth 2,75 milionë banorë,” thekson media gjermane.
Revista nxjerr blof edhe Ramën që tha se nuk ka projekt.
“Edhe pse Rama thekson vazhdimisht se projekti ende nuk është miratuar përfundimisht, duket se punët përgatitore tashmë kanë nisur. Zona të tëra janë rrethuar dhe raportohet se fadromat po punojnë pa leje dhe pa vlerësim të ndikimit në mjedis. Mediat shqiptare kanë bërë të ditur gjithashtu se qeveria e Ramës dyshohet se ka dhënë zyrtarisht lejen për ndërtimin e projektit që në janar 2025, pa një procedurë publike transparente”.
“Në rrugë, çështja e parave është temë kryesore. Ekonomia shqiptare mbetet e dobët dhe vendi ka një nga nivelet më të ulëta të PBB-së për frymë në Evropë. Shqiptarët me shumë gjasë nuk do të jenë klientët e këtyre resorteve luksoze. Përkundrazi, banorëve vendas po u mohohet hyrja në plazhe. Në video shihen grupe njerëzish duke çarë gardhet dhe telat me gjemba. Banorët e zonës janë të zemëruar,” shkruan revista më e madhe në Evropë.
Në fund, ata theksojnë se e vetmja pyetje aktualisht është se sa gjatë do të bashkëjetojë Edi Rama me shqiptarët.
“Rama është kryeministër që nga viti 2013 dhe synon ta çojë Shqipërinë në Bashkimin Evropian. Megjithatë, projektet e reja dhe ndryshimet në ligjin për mbrojtjen e natyrës mund ta rrezikojnë këtë proces. Edhe Komisioni Evropian ka shprehur shqetësime dhe së fundmi i ka kujtuar qeverisë shqiptare se para anëtarësimit duhet të respektojë standardet mjedisore të BE-së. Një zëdhënës i Komisionit Evropian i tha CNN-it se Ministria shqiptare e Mjedisit ka garantuar se “punimet ndërtimore janë pezulluar”.
Megjithatë, kryeministri Rama vazhdon ta mbështesë projektin e lidhur me familjen Trump. Ai deklaroi për CNN se projekti luksoz nuk do të “hedhë beton mbi kokat e flamingove”, por synon të tregojë se zhvillimi dhe natyra mund të “bashkëjetojnë”.
Mbetet vetëm pyetja se sa gjatë do të mund të bashkëjetojnë ende ai dhe populli i tij”.
Marrë nga Der Spiegel
