Detaje janë zbardhur nga incidenti i ndodhur mbrëmjen e djeshme ku hapësira ajrore shqiptare u bllokua përkohësisht për rreth 30 minuta, si shkak i një defekti teknik në sistemin e radarëve të AlbControl. Asnjë avion nuk u lejua të ulet apo të ngrihet nga pista e aeroportit “Nënë Tereza”, si masë sigurie deri në rikthimin e plotë të sistemeve.
Gjithçka filloi rreth orës 17:30, duke sjellë fikjen e menjëhershme të sistemeve të monitorimit. Kompnaia AlbControl njoftoi se rreth orës 18:00, u arrit rikthimi i 90% të funksioneve normale të sistemit, por pezullimi i fluturimeve përkohësisht shkaktoi kaos.
Ndërkohë edhe Aeroporti Ndërkombëtar i Tiranës informoi se gjithë stafi u angazhua për menaxhimin e pasagjerëve të prekur nga vonesat dhe ndryshimet në oraret e fluturimeve. Pas rikthimit normal të sistemit u njoftua se 5 fluturime ishin anulluara, u riskedulua për ditën e sotme, 12 fluturime u vonuan në nisje dhe 3 fluturime në ardhje.
“Në të vërtetë ka pasur disa kufizime për problemin që ka ndodhur. Sepse ne jemi informuar per nje problem elektrik ne Shqipëri. Prandaj ka ndodhur ky pezullim.”, njoftoi Eurocontroll për Dosja.al.
Situata riktheu në vëmendje nevojën mbi qëndrueshmërinë e sistemeve që garantojnë sigurinë e jetës së mijëra udhëtarëve çdo ditë.
Marrë nga Zëri.akl
