Shpërthimi në pikën e karburantit ‘Eida’ në zonën e Brrylit në Tiranë shkaktoi dëme të shumta materiale dhe tre punonjës mbetën të plagosur. Mësohet se shpërthimi ka ardhur si pasojë e një bombole gazi në ambientet e karburantit, ku furnizohen automjetet me gaz.
Në momentin e shpërthimit, në karburant ndodhej një automjet që po furnizohej me gaz. Tre punonjësit e plagosur janë transportuar në spital, ku po marrin ndihmë mjekësore. Nga shpërthimi është shembur edhe godina njëkatëshe ku qëndronin punonjësit. Njëri prej punonjësve ka mbetur i bllokuar brenda godinës për disa minuta, por ndërhyrja e banorëve të zonës ka bërë të mundur nxjerrjen e tij, duke shmangur pasoja edhe më të rëndë, ndërsa flakët kishin përfshirë biznesin.
Banorë të tmerruar kanë dalë në rrugë nga frika dhe janë shprehur se momenti i shpërthimit ishte si tërmet. Ndërkohë, në vendngjarje kanë mbërritur policia, shërbimet zjarrfikëse dhe autoambulancat, të cilat po punojnë për të neutralizuar çdo rrezik të mëtejshëm.
Marrë nga Dosja.al
