Ngërçi me pagat e magjistratëve ka sjellë tensione në sistemin gjyqësor.
Sot në orën 10:00, gjyqtarët do të mblidhen në mënyrë urgjente pranë KLGJ-së për të diskutuar situatën.
Ndërkohë, administrata dhe sekretaritë e Gjykatës së Tiranës kanë pezulluar shërbimet, duke kërkuar zgjidhjen e problemit të pagave. E njëjta situatë është edhe në gjykatat e Vlorës, Fierit dhe Lushnjës, ndërsa Gjykata e Apelit ka vendosur të rikthehet në punë.
Ngërçi i krijuar me pagat e gjyqtarëve është kthyer dhe në mollë sherri mes palëve politike në Konferencën e Kryetarëve. Përfaqësuesit e opozitës kërkuan zbatimin e vendimit të Gjykatës Kushtetuese për nxjerrjen nga kolapsi të sistemit të drejtësisë, duke paralajmëruar votën kundër nismës së socialistëve që pritet të miratohet në 17 shtator. Socialistët ndërkohë insistojnë se kompetencën për përcaktimin e pagave në sistemin e drejtësisë e ka Kuvendi.
Punonjësit në sistemin e drejtësisë kërkojnë që të kalojë paga për gushtin me rritjen e re, me vendimin e përcaktuar nga Gjykata Kushtetuese.
Kushtetuesja në një reagim të bërë publik në 7 shtator tha se parlamenti duhet që të zbatojë vendimin e dhënë prej saj, në datë 17 shkurt.
“Gjykata rithekson se vendimet e saj janë përfundimtare dhe të detyrueshme për zbatim. Respektimi dhe zbatimi i tyre përbën një kërkesë të drejtpërdrejtë të rendit kushtetues dhe është i lidhur ngushtësisht me parimin e shtetit të së drejtës dhe të sigurisë juridike”, thuhej në reagimin e GJK-së.
Marrë nga Syri.net
