Nga Adelheid Woelfl
Në Shqipëri, mijëra njerëz dolën sërish në rrugë për të protestuar kundër korrupsionit, projekteve luksoze dhe rritjes së kostove të arsimit. Ndërkohë, protestat po përhapen edhe në universitete dhe shkolla.
Të mërkurën në mbrëmje, protestat mes demonstruesve kundër qeverisë dhe efektivëve të policisë u përshkallëzuan sërish në kryeqytetin shqiptar, Tiranë. Protestuesit sulmuan Ministrinë e Drejtësisë. Policia përdori gaz lotsjellës dhe topa uji kundër tyre.
Disa dyqane u sulmuan dhe pjesërisht u plaçkitën. Në të gjithë qytetin u vunë flakën kazanëve të plehrave. Edhe një filial i Raiffeisen Bank u dogj. Përpara një komisariati policie pati një përshkallëzim të situatës dhe përplasje me efektivët.
Revolucioni i Flamingove
Protestat, që prej muajsh zhvilloheshin në mënyrë paqësore kundër korrupsionit dhe resorteve turistike në një zonë të mbrojtur peizazhore, u përshkallëzuan pjesërisht në dhunë që të martën. Demonstruesit hynë në Ministrinë e Arsimit, thyen dritaret dhe hodhën gurë e mjete ndezëse. U shkulën gardhet dhe tullat fluturonin në ajër. Shumë të rinj mbuluan fytyrat për të mos u identifikuar nga policia.
Shkak për protestat, të cilat vazhdojnë që prej muajit maj, është një resort luksoz i planifikuar në bregdet, që do të ndërtohet, ndër të tjera, nga një kompani e lidhur me rrethin e Jared Kushner, dhëndrit të presidentit amerikan Donald Trump. Protesta e parë u zhvillua më 31 maj, një ditë pasi një qytetar ishte sulmuar nga personeli privat i sigurisë gjatë një demonstrate në Zvërnec, në bregdet.
Protestuesit kërkojnë me këmbëngulje dorëheqjen e kryeministrit Edi Rama, të cilin e konsiderojnë politikisht përgjegjës për resortet luksoze. Në Tiranë, protestat e përnatshme në kuadër të “Revolucionit të Flamingove” zhvillohen prej 135 ditësh.
Mundësitë për arsimim
Të mërkurën, demonstratat u përhapën edhe në universitetet e Elbasanit dhe të Shkodrës. Organizatorët studentorë deklaruan se protesta e tanishme drejtohet kundër gjendjes në universitete, kostove të arsimit të lartë, si dhe mungesës së mbështetjes financiare dhe perspektivave profesionale pas diplomimit.
Mijëra njerëz, kryesisht të rinj, dolën në rrugë për të protestuar tashmë edhe kundër mundësive të kufizuara për arsimim, ashtu si në Francë. Në Tiranë, edhe shkollat zhvilluan grevë. Nxënësit dhe studentët marshuan së bashku për orë të tëra nëpër qytet.
Raportime për dhunë policore
Policia publikoi një deklaratë, në të cilën bëri thirrje për qetësi.
“Çdo person që përdor dhunë, i vë flakën pronës ose e shkatërron atë, apo sulmon efektivët e policisë, mban përgjegjësi individuale dhe do të përgjigjet para ligjit në përputhje me veprat penale të kryera”, thuhej në deklaratë.
Të paktën 20 protestues u arrestuan. Sipas Ministrisë së Shëndetësisë, aktualisht «tre protestues dhe dy efektivë policie po marrin trajtim mjekësor urgjent».
Presidenti Bajram Begaj deklaroi se po e ndiqte «me shqetësim» përshkallëzimin e tensioneve në rrugët e Tiranës dhe u bëri thirrje “të gjitha palëve të veprojnë me përgjegjësi dhe maturi”.
Të mërkurën u shtuan raportimet për dhunë të rëndë policore.
Katër efektivë policie dhe drejtuesi i sektorit të rendit publik pritet të pezullohen nga detyra, pasi u publikua një video ku shihej se si policët e largonin në mënyrë të ashpër një 19-vjeçar me këmbë të thyer.
Gazetarja e Euronews Albania, Alice Taylor, raportoi se një efektiv policie ia kishte marrë telefonin pa paralajmërim, ndërsa ajo po bënte fotografi.
Marrë nga Der Standard
