Ministria e Shëndetësisë ka bërë bilancin e të lënduarve pas protestës së djeshme. Gjashtë persona vijojnë të jenë të shtruar në Spitalin e Traumës, ndërsa tre prej tyre pritet t’i nënshtrohen ndërhyrjeve mjekësore.
89 persona kanë marrë kujdes shëndetësor pas protestës së djeshme, sipas bilancit të publikuar nga Ministria e Shëndetësisë, bazuar në të dhënat e Spitalit Universitar të Traumës dhe Qendrës Spitalore Universitare “Nënë Tereza”.
Nga personat e lënduar, 61 janë efektivë të Policisë dhe 18 janë protestues, të cilët janë trajtuar në Spitalin Universitar të Traumës. Ndërkohë, 10 pacientë të tjerë kanë marrë trajtim mjekësor në QSUT.
Sipas njoftimit zyrtar, aktualisht në Spitalin e Traumës vijojnë të jenë të shtruar katër efektivë policie dhe dy protestues, të cilët do të qëndrojnë nën kujdesin e ekipit mjekësor.
Gjithashtu, tre persona, mes tyre dy efektivë policie dhe një protestues, pritet t’i nënshtrohen ndërhyrjeve mjekësore. Ministria e Shëndetësisë bën me dije se ata janë të vetëdijshëm dhe në gjendje të mirë shëndetësore.
Ndërkohë, në QSUT, 10 pacientët janë trajtuar në shërbimet e Urgjencës Polivalente, Djegie-Plastikës dhe Okulistikës. Pas vlerësimit dhe marrjes së trajtimit të nevojshëm, të gjithë janë larguar nga spitali me rekomandimin e mjekëve. Sipas Ministrisë së Shëndetësisë, aktualisht nuk ka persona të lënduar që vijojnë të marrin kujdes shëndetësor në QSUT.
Marrë nga Scantv.al
