Një grup avokatësh, gazetarësh, deputetësh, përfaqësuesish të shoqërisë civile dhe akademikësh i kanë drejtuar një letër Komisioneres Evropiane për Zgjerimin, Marta Kos, ku shprehin zhgënjimin për deklaratën e Komisionit Evropian të 18 tetorit mbi protestat në Shqipëri.
Në letrën e tyre, nënshkruesit vlerësojnë se deklarata e Komisionit dënon aktet e dhunës që u atribuohen protestuesve, por nuk përmend raportimet për pesë ditë përdorimi joproporcional të forcës policore ndaj demonstruesve paqësorë, përfshirë studentët.
Sipas tyre, ky qëndrim i njëanshëm rrezikon të interpretohet si mbështetje për mënyrën se si autoritetet shqiptare kanë menaxhuar protestat, duke krijuar premisa për përshkallëzimin e dhunës shtetërore. Ata argumentojnë gjithashtu se një qasje e tillë cenon besueshmërinë e standardeve të Komisionit Evropian për të drejtat themelore në vendet kandidate dhe dobëson besimin e të rinjve shqiptarë te Bashkimi Evropian.
Në letër, nënshkruesit i kërkojnë Komisionit Evropian të sqarojë publikisht se standardi i llogaridhënies zbatohet njësoj edhe për rastet e përdorimit të tepruar të forcës nga organet e rendit. Ata kërkojnë gjithashtu një hetim të shpejtë dhe të pavarur për pretendimet për sjellje të pahijshme të policisë.
Një tjetër kërkesë është që këto ngjarje të përfshihen në vlerësimin e Shqipërisë në kuadër të Grupkapitullit të Themeloreve, përkatësisht Kapitullit 23, në raportin e ardhshëm të Komisionit Evropian për vendin.
Nënshkruesit i referohen gjithashtu deklaratave publike të kryeministrit Edi Rama ndaj protestuesve, duke vënë në dukje kontrastin mes garancive që, sipas tyre, Komisioni ka marrë nga qeveria dhe gjuhës së përdorur nga kreu i qeverisë në komunikimin me qytetarët.
Letra është nënshkruar nga Dr. Mirza Balaj, në emër të një grupi ku bëjnë pjesë deputetët Redi Muçi dhe Mariana Koceku, avokatet Edlira Cepani dhe Irena Dule, organizatat e shoqërisë civile AOS, PPNEA dhe Diaspora e Shqipërisë, akademikët Ervin Goci dhe Ermal Pashaj, si dhe gazetari Gjergj Erebara.
Në përfundim, grupi shpreh gatishmërinë për të diskutuar shqetësimet e ngritura me kabinetin e Komisioneres Kos ose me Drejtorinë e Përgjithshme për Zgjerimin dhe Partneritetin Lindor (DG ENEST).
Marrë nga Hashtag.al
