Skema “Frühstartrente” parashikon financim shtetëror për brezat e lindur nga viti 2020. Nisja planifikohet në janar 2027, ndërsa nevojitet edhe miratimi i Bundesratit.
Bundestagu gjerman miratoi të premten, më 16 tetor 2026, skemën “Frühstartrente”, që parashikon nisjen e kursimit për pension që në fëmijëri. Shteti do të kontribuojë me dhjetë euro në muaj për çdo fëmijë që plotëson kushtet e programit.
Projektligji mori mbështetjen e CDU/CSU-së dhe SPD-së. Të Gjelbrit dhe partia E Majta votuan kundër, ndërsa AfD-ja abstenoi.
Mbështetja do të investohet në një llogari të posaçme për pensionin e ardhshëm. Familjet nuk do t’i marrin këto para për shpenzimet e përditshme dhe fëmijët nuk do të mund t’i tërheqin sapo të mbushin 18 vjeç. Sipas skemës së miratuar në Bundestag, tërheqja e kapitalit të financuar parashikohet, në parim, jo përpara moshës 65-vjeçare.
Programi parashikohet të nisë më 1 janar 2027, me fëmijët e lindur në vitet 2020 dhe 2021. Më pas, çdo vit do të përfshihet brezi që mbush gjashtë vjeç. Kontributi shtetëror do të vazhdojë deri në moshën madhore.
Prindërit mund të lidhin një kontratë të posaçme në emër të fëmijës te një ofrues i certifikuar. Për fëmijët përfitues, prindërit e të cilëve nuk hapin një kontratë individuale, parashikohet një mekanizëm kolektiv investimi, i administruar nga Bundesbank-u. Kjo synon që pjesëmarrja të mos varet vetëm nga iniciativa apo mundësitë financiare të prindërve.
Miratimi në Bundestag është një hap vendimtar, por procedura ligjore ende nuk ka përfunduar. Për hyrjen në fuqi kërkohet edhe miratimi i Bundesratit, dhomës që përfaqëson landet gjermane.
Marrë nga Botasot.info
