Kosova ka arritur një fitore të thellë me rezultatin 4-0 në transfertë me Qipron, ndeshje kjo e vlefshme për edicionin e ri të Ligës së Kombeve.
Një reagim i tillë pritej nga “Dardanët” pas asaj humbje të dhimbshme që pësuan në “Fadil Vokrri” me rezultatin 3-0 ndaj Rumanisë.
Kosova fillimisht epërsinë e mori në minutën e tetë me anë të Vedat Muriqit i cili u tregua i saktë nga pika e bardhë për 1-0.
“Dardanët” patën edhe një tjetër mundësi të artë shënimi me anë të Ermal Krasniqit, i cili në minutën e 38-të dështoi të shënojë përballë portierit.
Të besuarit e Franco Fodës nuk u ndalën as në pjesën e dytë duke arritur që të tundin rrjetën edhe në dy raste të tjera.
I inkuadruari në pjesën e dytë, Albion Rrahmani, arriti që të shënojë për 3-0 në minutën e 48-të pas një asistimi të Milot Rashicës.
Goditjen përfundimtare qipriotëve ua dha Lumbardh Dellova, i cili në cilësinë e sulmuesit realizoi një gol të bukur për 4-0 në minutën e 55-të.
Me këtë fitore Kosova tani pozicionohet në vendin e dytë në tabelë me pikë të barabarta me Qipron dhe me Rumaninë që në orën 20:45 do përballet me Lituaninë.
