Ditën e sotme po mbahet seanca plenare e radhës. Seanca nisi me një interpelancë mes kryeministrit Edi Rama dhe deputetit të PD, Gazmend Bardhi, e cila është kërkuar nga demokrati, në lidhje me transportin e mbetjeve të rrezikshme, toksike, të nisura nga Porti i Durrësit, drejt Kinës dhe Tajlandës.
Gjatë fjalës së tij Bardhi tha se, qeveria duhet ta kishte sqaruar skandalin e mbetjeve toksike pa qenë nevoja që opozita të thirrte Ramën për interpelancë pasi ngjallte panik tek qytetarët dhe lidhej me jetën dhe shëndetin e tyre. Ai shtoi se është transportuar një material që del nga oxhaqet e fabrikave metalurgjike. Bardhi tha se, dërgesa të kësaj natyre sipas informacioneve, bëhen rregullisht nga porti i Durrës dhe se hiri i transportuar i takon Sokolaj Shpk, e licencuar dhe mbetjet e i përkasin Kurumit.
Ai publikoi një komunikim në SKY ECC, që sipas tij tregon se, kush e ka zgjedhur kreun e Policisë së Shkodrës. Bardhi tha se, ky drejtor i policisë së Shkodrës, u emërua një muaj pas emërimit të ministrit të Brendshëm, për të cilin demokrati tha se, është përfaqësues i një prej bandave më të rrezikshme në vend.
Gjatë fjalës së tij Rama iu përgjigj Bardhit se, nuk është kryer asnjëlloj analize, as nga transportuesi, as nga vendi tranzitues në BE, as nga vendi pritës. Sipas tij, analizat nuk janë bërë sepse nuk analizohet çdo ngarkesë. Ai shtoi se mbetjet e rrezikshme sipas ligjit trajtohen në mënyrë të procesit të riciklimit dhe asgjësimit. Sipas tij goja shumëtellallëshe po iu nxin shqiptarëve se mbetjet do vijnë në Shqipëri.
Gjithashtu në rend dite është parashikuar dhe një interpelancë me zv.kryeministren Belinda Balluku. Kjo interpelancë është kërkuar nga një grup deputetësh të PD në lidhje me ndërtimin e segmentit Thumanë-Kashar dhe aksin “Rruga e Kombit”.
Një pikë tjetër e rëndësishme e rendit të ditës është edhe shqyrtimi i mandatit të Olta Xhaçkës, për dërgimin në Gjykatën Kushtetuese të mocionit të 1/10 së deputetëve për papajtueshmërinë e mandatit.
