Një person i armatosur hapi zjarr me një armë automatike të hënën në mbrëmje pranë stacionit të trenit Bruxelles-Midi, duke shkaktuar alarm te autoritetet belge, në një kohë kur kryeqyteti po përballet me një valë të vazhdueshme dhune të armatosur, të lidhur me trafikun e drogës.
“Një djalë hapi zjarr me një kallashnikov para fëmijëve. Ka vrima plumbash në tokë”, deklaroi Spinet për gazetarët.
Incidenti i së hënës është i treti radhazi në të njëjtën zonë. Të shtunën në mbrëmje, të shtënat plagosën një person, ndërsa të dielën në mëngjes, një plumb goditi dritaren e një apartamenti.
“Dikush duhet të vijë dhe të na ndihmojë”, tha të martën kryebashkiaku i Saint-Gilles, duke kërkuar përforcime për zonën.
Saint-Gilles është prej vitesh e prekur nga dhuna e lidhur me bandat e drogës, veçanërisht në zonën përreth stacionit të trenit Midi.
Në qershor 2024, dy persona u vranë dhe tre të tjerë u plagosën pasi persona të armatosur hapën zjarr me kallashnikovë në një kafene pranë stacionit Midi. Pavarësisht përforcimit të pranisë policore të njoftuar nga autoritetet, situata vijon të mbetet problematike.
“Kam kërkuar përforcime për tre vjet”, tha Spinet.
Zona policore Saint-Gilles dhe Midi ka rreth 700 oficerë, ndërsa bashkia rriti vitin e kaluar me 1.8 milionë euro kontributin e saj vjetor për forcat e sigurisë.
Sipas të dhënave të publikuara nga gazeta Le Soir, të paktën 66 incidente me të shtëna me armë zjarri janë regjistruar në rajonin e Brukselit gjatë vitit 2026.
Marrë nga Le Soir
