Parlamenti rus ka miratuar një ligj i cili i jep autoritetin presidentit Vladimir Putin të dërgojë trupa ushtarake jashtë kufijve të vendit me qëllim “mbrojtjen e qytetarëve rusë”. Ky vendim shihet si një hap që mund të përdoret për ndërhyrje ushtarake në shtete të tjera, duke rritur shqetësimet për sigurinë në Evropë.
Sipas njoftimit zyrtar, ligji është hartuar për të garantuar mbrojtjen e rusëve në rast arrestimi, dënimi apo sulmi nga autoritete të huaja.
Kryetari i Dhomës, Vjaçeslav Volodin, e cilësoi sistemin e drejtësisë perëndimore si “represiv” ndaj atyre që kundërshtojnë politikat e BE-së, duke theksuar se Rusia duhet të bëjë gjithçka për të siguruar qytetarët e saj jashtë vendit.
Ky argument është i ngjashëm me narrativën që Kremlini përdori për të justifikuar aneksimin e Krimesë në vitin 2014 dhe nisjen e luftës në Ukrainë në 2022. Shefi i komisionit parlamentar për mbrojtjen, Andrej Kartapolov, tha se ligji do të kundërshtojë “rusofobinë e përhapur” jashtë vendit, por kritikët paralajmërojnë se ai mund të shërbejë si bazë për ndërhyrje të reja ushtarake.
Ndërkohë, Rusia vijon sulmet me raketa dhe dronë ndaj Ukrainës, si dhe operacionet hibride ndaj vendeve të NATO-s, duke shtuar presionin mbi shtetet evropiane që të forcojnë kapacitetet e tyre mbrojtëse. Paralajmërimet e Kremlinit ndaj vendeve baltike e bëjnë ligjin e ri edhe më shqetësues për fqinjët e Rusisë.
Marrë nga Tass.ru
