Alarmet për raketa po i kushtojnë Ukrainës rreth 45 milionë dollarë për çdo orë që aktiviteti ekonomik ndërpritet, sipas ministrit të Ekonomisë të vendit, Oleksandr Kravenchko, ndërsa Kievi po kërkon mënyra për ta mbajtur ekonominë në funksion nën bombardimet gjithnjë e më intensive ruse.
Rusia ka vënë gjithnjë e më shumë në shënjestër infrastrukturën që mbështet ekonominë e Ukrainës, duke goditur objekte industriale, magazina, qendra logjistike dhe qendra të të dhënave, në atë që Kravchenko e ka përshkruar si një përpjekje për të “shkatërruar pothuajse të gjithë ekonominë”.
“Ajo që nuk e kishim parashikuar plotësisht ishte se sa shpejt Rusia do t’i zhvillonte këta dronë me motor reaktiv dhe do t’i përdorte për të goditur gjithçka”, ka thënë ai, duke iu referuar përdorimit nga Rusia të armëve të reja që kanë goditur Kievin gjatë javëve të fundit.
Duke folur nga godina e qeverisë në Kiev, e cila mbrohet fort, Kravchenko, një ish-drejtues i kompanisë McKinsey, i cili i është bashkuar qeverisë gjatë verës, ka thënë se sulmet po detyronin pjesë të mëdha të ekonomisë të ndalonin vazhdimisht aktivitetin, ndërsa punonjësit dërgoheshin në strehimore, me sirenat që zgjasnin deri në 10 orë në ditë.
“Nëse njerëzit janë në bunker, biznesi ndalon”, ka thënë ai.
Për të zbutur kostot ekonomike, qeveria ka prezantuar së fundmi një sistem të ri paralajmërimi me dy nivele, i cili synon t’i mbajë bizneset në funksion gjatë alarmeve të zgjatura për sulme ajrore.
Një alarm “i kuq” paralajmëron për kërcënim nga raketat dhe kërkon që njerëzit të kërkojnë strehim, ndërsa një paralajmërim “i verdhë” përdoret për kërcënime nga dronët, duke u lejuar shumë bizneseve të vazhdojnë punën.
Më shumë se gjysma e bizneseve funksionojnë gjatë alarmeve të verdha, ka thënë Kravchenko.
Kravchenko ka thënë se vetëm gjatë këtij viti sulmet ruse kanë shkaktuar rreth 10 miliardë dollarë dëme në asetet fikse, me fabrikat e çelikut, magazinat, infrastrukturën logjistike dhe, së fundmi, qendrat e të dhënave ndër objektivat e goditura.
Rusia gjithashtu ka bllokuar në mënyrë efektive portet ukrainase të Detit të Zi, të cilat para bllokadës përpunonin pjesën më të madhe të eksporteve të vendit.
Ministri beson se qeveria është më e përgatitur këtë vit për atë që mund të jetë “dimri më i vështirë, më i ashpër” i luftës, ndërsa pritet presion i mëtejshëm mbi furnizimin me energji, infrastrukturën dhe bizneset, të cilat tashmë janë dobësuar nga muajt e sulmeve.
Dëmet e vazhdueshme nga sulmet i janë shtuar presionit tashmë të madh mbi financat e shtetit.
Presidenti Volodymyr Zelensky së fundmi e ka vlerësuar deficitin e mbetur buxhetor të Ukrainës për këtë vit në rreth 27 miliardë dollarë, shifër që ka ngritur pikëpyetje te disa qeveri evropiane se si u krijua ky boshllëk, pavarësisht se BE-ja ka miratuar tashmë një paketë kredie prej 90 miliardë eurosh për Ukrainën, që mbulon vitet 2026 dhe 2027.
Kravchenko ka thënë se qeveria që atëherë e ka ngushtuar deficitin në 20 miliardë dollarë përmes shkurtimit të shpenzimeve dhe identifikimit të rezervave të tjera të brendshme.
Kievi zyrtar tani po kërkon mbështetje të mëtejshme nga BE-ja, Japonia, Kanadaja dhe Mbretëria e Bashkuar, duke përfshirë mundësinë e paraprirjes së kredive që ishin planifikuar për vitin e ardhshëm, ka thënë Kravchenko.
Marrë nga Associated Press
