Kufizimi i fjalës së lirë është bërë kërcënimi më i madh për demokracinë amerikane, pohoi kandidati republikan për zëvendëspresident, J.D. Vance gjatë debatit televiziv të martën.
Kandidati për zëvendëspresident i Donald Trump-it për zgjedhjet e nëntorit u përball me kundërshtarin e tij demokrat, guvernatorin e Minesotës Tim Walz, në CBS News.
Vance i referohej sulmit të 6 janarit 2021 në ndërtesën e Kapitolit të SHBA në Uashington nga mbështetësit e Trump-it pas humbjes së tij në zgjedhje. Trump, deklaratat publike të të cilit dyshohet se kanë nxitur trazirat e Kapitolit, përballet me katër akuza për krime federale në këtë rast. Ai akuzohet se ka vepruar në mënyrë të paligjshme pas zgjedhjeve të vitit 2020, duke u përpjekur të përmbysë rezultatin.
Ish-presidenti i ka mohuar vazhdimisht shkeljet dhe e ka denoncuar rastin si një përpjekje për ta penguar atë të kthehet në Shtëpinë e Bardhë. Në një seri postimesh në platformën e tij “Truth Social” në gusht, ai e quajti atë “një sulm të drejtpërdrejtë ndaj demokracisë” dhe një “ringjallje të një gjuetie të vdekur shtrigash”.
Në debatin televiziv, Vance argumentoi: “Unë besoj se ne në fakt kemi një kërcënim për demokracinë në këtë vend. Fatkeqësisht, nuk është kërcënimi për demokracinë për të cilin duan të flasin Kamala Harris dhe Tim Walz. Është kërcënimi i censurës.”
Ai vazhdoi duke akuzuar kompanitë e mëdha të teknologjisë për “mbyllje të gojës së bashkëqytetarëve të tyre”.
Në gusht, drejtori ekzekutiv i Metas, Mark Zuckerberg tha se zyrtarë të lartë të administratës së Biden-it i kishin bërë presion Facebook-ut për të “censuruar” disa përmbajtje të Covid-19 gjatë pandemisë. Ai gjithashtu pranoi se Facebook shtypi një histori të New York Post për Hunter Biden pas një paralajmërimi të FBI-së në prag të zgjedhjeve të 2020.
“Fjalët e një presidenti kanë rëndësi. 6 janari nuk ishte në reklama në Facebook,” u përgjigj Walz, për çështjen e trazirave të Kapitolit të janarit 2021.
Ai e pyeti drejtpërdrejt Vance-in, nëse Trump i humbi zgjedhjet e 2020. Vance u përgjigj se Trump është “i përqendruar tek e ardhmja”.
