Ish drejtori i shoqërisë publike të naftës Albpetrol Endri Puka, i njohur si mëkëmbës i Koço Kokëdhimës, rezulton i përfshirë në një skemë korruptive sa banale aq edhe flagrante me kompaninë private të naftës Bankers Petroleum, nën akuzë për ‘gropën’ 5.5 miliardë euro me pasurinë nëntokësore të Shqipërisë.
Endri Puka, ish administrator i kompanive të Koço Kokëdhimës, ka drejtuar Albpetrolin gjatë periudhës 2014-2018, me ndërhyrjen e dyshuar të ish pashait të Jugut, para krisjes me Edi Ramën. Përpos të tjerave, Kontrolli i Lartë i Shtetit, në një raport të vitit 2017, ka konkluduar se Albpetrol i ka shkaktuar shtetit 150 milionë euro dëm, si pasojë e monitorimit të dobët të marrëveshjeve hidrokarbure me Bankers.
Sipas raportit, kur drejtohej nga Endri Puka, Albpetrol ka miratuar pasqyrat e fryra dhe abuzive finamciare të Bankersit, kompani e cila çdo vit manipulonte shpenzimet për të mospaguar taksa dhe përfituar nga skema e TVSH-së, siç edhe e ka komfirmuar hetimi i Prokurorisë Fier. Mashtrimi i madh financiar i Bankersit është vulosur nga Albpetrol, ku palët dyshohet se kanë ndarë ‘plaçkën’ e vjedhur.
Në vitin 2019, pas shkarkimit si administrator i Albpetrol dhe hapjes së një dosje penale, Endri Puka themelon kompaninë AKSENT L&BC, me objekt hartimin e strategjive të biznesit. Puka është administrator dhe aksioner me 75 % të aksioneve. Gjatë viteve 2023-2024, përmes kompanisë AKSENT L&BC, Endri Puka përfiton 1.4 milionë euro nga kompania Bankers.
Hetimi i Prokurorisë së Fierit për aferën Bankers, ndonëse i brishtë dhe i mangët, ka konstatuar se faturimet mes Bankers dhe kompanisë së Pukës janë fiktive, që do të thotë se Bankers i ka dhënë Pukës 1.4 milionë euro jo për ndonjë shërbim të ligjshëm, por në kuadër të skemës së vjedhjes kur Puka drejtonte Albpetrolin.
Nisur nga këto fakte, ngrihen dyshime bazuar në prova se Puka ka dëmtuar interesat e shtetit kur ishte administrator i Albpetrol, duke favorizuar Bankers, ndërsa Bankers i ka dhënë në këmbinim ryshfet 1.4 milionë euro, kamufluar si shërbim në dukje i rregullt.
Marrë nga Papaskena.al
