Përbërja e Parlamentit të ri Europian ka gjithsej 720 deputetë ose 15 deputetë më shumë se në përbërjen e legjislaturës së mëparshme. Prej tyre 39 për qind janë femra, ndërsa 54 për qind janë zgjedhur si deputetë për herë të parë.
Këtë të enjte PE-ja do të votojë edhe për zgjedhjen e Ursula von der Leyen si presidente e Komisionit Europian për një mandat të ri pesëvjeccar. Nëse ajo nuk merr të paktën 361 vota, atëherë BE-ja mund të hyjë në një krizë institucionale.
Seanca e parë konstituoi përbërjen e dhjetë të Parlamentit Europian, ndërsa po aty u zgjodh si kryetare e tij, Roberta Metsola. Edhe më parë, ajo ishte në krye të legjislativit europian, ndërsa do ta vazhdojë një funksion të tillë edhe për dy vjet e gjysmë, për ta lëshuar më pas vendin për një deputet tjetër që mund të vijë nga radhët e socialistëve ose demokratëve.
Zgjedhja e saj, është një rezultat konsensusi mes tri grupeve kryesore politike për një paketë, në të cilën janë edhe tri funksione të tjera udhëheqëse në institucionet e BE-së.
Maltezja mori 562 vota nga 599 deputetë të pranishëm, shumë përtej shumicës së nevojshme prej 50 për qind, plus një votë.
Pas votimit Metsola u premtoi deputetëve se nuk do t’i zhgënjejë dhe do të punojë për një Europë më të drejtë, më të sigurt dhe më të barabartë për të gjithë qytetarët e saj.
Ajo tha se do të angazhohet për vazhdimin e ndihmës në Ukrainë, e cila po vazhdon të përballet me agresionin rus.
“Na duhet të ngrihemi dhe të jemi gati. Në mandatin e fundit mësuam se e ardhmja nuk është asgjë tjetër veçse e paparashikueshme. Kjo duhet të jetë një shtëpi që nuk mund të ketë frikë për të udhëhequr dhe për të ndryshuar. Ne kemi filluar, por nuk kemi mbaruar ende”, ka thënë Metsola në fjalimin e saj.
Parlamenti Europian me këtë përbërje ka tetë grupime politike, një më shumë se ai para tij.
Grupimi më i madh, me 188 deputetë, do të jetë ai i qendrës së djathtë me emrin Partia Popullore Europiane. Socialistët dhe Demokratët me 136 kanë mbetur në vendin e dytë, ndërsa në të tretin është ngritur grupimi i ri i krijuar nga partitë e ekstremit të djathtë “Patriotët për Europën” me 83 deputetë.
Konservatorët janë në vendin e katërt me 78 deputetë, ndërsa me vetëm një deputet më pak në vendin e pestë janë liberalët që kanë shënuar rënie të madhe.
Grupimi i të Gjelbërve është në vendin e gjashtë me 53 deputetë, ndërsa pas tyre vijnë grupi i të majtëve me 46, dhe ai i Sovranistëve me 25 deputetë. Të tjerët, pra 33 deputetë, do të veprojnë si të pavarur jashtë grupeve ekzistuese politike.
Në këtë përbërje do te jetë edhe një deputet shqiptar nga Suedia dhe një deputet grek nga Shqipëria.
Deputeti me prejardhje shqiptare dhe me shtetësi suedeze është Adnan Dibrani nga radhët e Socialistëve dhe Demokratëve. Para tij, nga Suedia ka qenë edhe një eurodeputete, Arba Kokalari, nga radhët e Partisë Popullore Europiane.
Ndërsa nga Shqipëria i zgjedhur në listën e Partisë greke Demokracia e Re është Alfred Beleri. Atij i është dhënë leja e posaçme nga autoritetet e burgjeve në Shqipëri ku po e vuan dënimin për shkak të manipulimeve në procesin zgjedhor, për të bërë betimin.
