Më shumë se 25 miliardë lekë do t’i kushtojë buxhetit të shtetit ndërtimi i platformës qeveritare “e-Albania” nga e para. Institucioni i drejtuar nga Mirlinda Karçanaj, AKSHI ka vendosur të tenderojë përmesë dy procedurave të ndara, projektin për versionin 2.0 të platformës qeveritare.
1- Implementimi i platformës qeveritare të ndërveprimit 2.0 dhe site sekondare -, me vlerë 816,666,662.00 Lekë pa TVSH;
2- Përmirësimi i shërbimeve elektronike me teknologji mikroservisi -, me vlerë 1,724,472,514.00 Lekë pa TVSH.
Të dyja këto procedura prokurimi janë njoftuar në Agjencinë e Prokurimeve dhe AKSHI fton të gjithë operatorët ekonomikë të interesuar, të paraqesin ofertat për më shumë se 25 miliardë lekë nga paratë e taksapaguesve shqiptarë.
Por kush do t’i gllabërojë këto miliarda?! Newsbomb.al raporton se dorëzimi i ofertave vijon prej datës 1 Tetor dhe deri tani, ka disa kompani që kanë shfaqur interes për të fituar këto dy procedura prokurimi. Dorëzimi i ofertave vijon deri më datë 1 Nëntor, kur të mbyllet zyrtarisht gara.
Mes kompanive të interesuara, redaksia mëson se është një operator ekonomik i cili ka marrë pjesë në disa procedura prokurimi të mëparshme dhe është klasifikuar me “flamur të kuq” nga databaza antikorrupsion “Open Data Albania”, për mungesë të konkurrencës dhe shpalljen fitues, duke skualifikuar gjithë të tjerët.
Newsbomb.al ka mësuar se kompania në fjalë, emrin e së cilës do ta bëjmë publik kur Agjencia e Prokurimeve të njoftojë mbylljen e garës, është denoncuar edhe publikisht për gllbërimin e miliarda lekëve nga institucionet shtetërore në shumë tendera të kategorizuar me probleme.
Pavarësisht konstatimit të vazhdueshëm në shkelje, kjo kompani synon të marrë dhe tenderin 17 miliardë lekë për “e-Albania 2.0”.
Marrë nga Newsbomb
