Deputetja e Partisë Demokratike, Jorida Tabaku, ka denoncuar qeverinë se po përdor fondet publike në shërbim të fushatës elektorale.
“400 milionë euro bëhen gati për ditët e fundit të janarit,” deklaroi Tabaku. “Paguajnë për projekte që nuk i kanë realizuar fare, që as kanë për të përfunduar ndonjëherë, por i duhen si karamele elektorale për t’i inauguruar në ditët e para të fushatës.”
Sipas deputetes së PD-së, kjo strategji e qeverisë është e mirënjohur, ku fondet publike shpesh shfrytëzohen në mënyrë të pabarabartë për të përforcuar pushtetin gjatë periudhave elektorale.
“Gjithçka është në funksion të fushatës,” theksoi ajo. “Projekte në 3D, rrugë që inaugurohen dhjetë herë, shkolla që nuk hapen, kompjuterë që nuk ekzistojnë, tunele që rrëzohen.”
Deputetja e PD-së e mbylli mesazhin e saj duke paralajmëruar për abuzimet e qeverisë dhe duke ftuar qytetarët të reagojnë ndaj praktikave të tilla, të cilat, sipas saj, dëmtojnë transparencën dhe demokracinë.
“Këto 400 milionë euro janë shembulli më i mirë i keqmenaxhimit dhe arrogancës së kësaj qeverie, që vepron gjithnjë në dëm të qytetarëve dhe në favor të pushtetit të saj,” përfundoi Tabaku.
Marrë nga Boldnews.al
