Autobuzët urbanë të linjës së plazhit në Durrës këtë fillim sezoni veror janë plot me turistë. Vapa e parakohshme ka sjellë pranë detit familjarë nga Kosova dhe vende të tjera. E megjithatë, fluksi i turistëve duket se i ka gjetur sërish të papërgatitur institucionet vendore.
Në gjatësinë prej 3.4 kilometrash të plazhit vijojnë punimet për zbatimin e projektit të Bashkisë dhe Fondit Shqiptar të Zhvillimit, që përfshin përfundimin e shëtitores dhe zgjerimin e fondit të rërës, një projekt me kosto të llogaritura në 367 milionë lekë.
Makineritë e rënda janë të stacionuara edhe në shëtitoren kryesore të Durrësit, ku po zhvillohet një tjetër projekt që parashikon zgjerimin e saj deri te Sfinksi.
Eksperti i turizmit, Edmond Basho thotë se me fillimin e qershorit, hotelet e plazhit të Durrësit patën një rritje kërkesash të minutës së fundit.
“Temperaturat u rritën para kohe dhe vendasit e të huajt kërkuan zgjidhje të tjera,” thotë Basho, duke theksuar se në vitet e shkuara prenotimet rriten në mesin e qershorit.
“Numri i turistëve pritet të jetë edhe më i lartë se sa vjet, pa llogaritur pushuesit e qershorit,” parashikoi ai.
Plazhi tradicional i Durrësit ndahet nga pjesa që më së shumti i përket bashkisë së Kavajës me 3-4 kilometra brez rëre, i cili prej më shumë se gjysmë shekulli i përket rezidencës qeveritare, Konvaleshencës së Ministrisë së Brendshme dhe komandës së forcave Tokësore e Detare.
Rrethimi i këtyre hapësirave e bezdis Mendim Jakupin, një mysafir nga Kosova që ka blerë së fundmi një apartament në Durrës.
“Nuk arrij ta kuptoj përse këto hapësira kufizohen nga plazhi i madh ku pushojmë ne me një gardh të shëmtuar dhe shpeshherë me tel me gjemba,” ankohet ai.
Por gruaja e tij, Jehona shprehet e kënaqur.
“Na duket vetja si në Pejën nga ku vijmë, tabelat e bizneseve mbajnë emrat e qyteteve të Kosovës, menutë e ushqimit janë thuajse njëlloj, takojmë shokë e miq, e kështu me radhë,” thotë ajo.
Megjithatë, vazhdimi i punimeve në zonat e plazhit i shqetëson pushuesit.
Mukadesi thotë se edhe pse bregu u shtua me 5-6 metra rërë, copa inertesh vazhdojnë të mbeten në sipërfaqe.
“Unë shëtis me shoqet çdo mëngjes dhe disa herë kam parë se si bregu i detit u mbush me inerte nga themelet e pallateve. Edhe tani, që bregu u shtua me 5-6 metra rërë, mjaft copa betoni vazhdojnë të jenë në sipërfaqe,” ankohet gruaja.
Në afërsi të Sfinksit, pronari i një lokali ankohet se punimet gjatë sezonit turistik po i largojnë mjaft nga klientët. Dy ditë më pare, shëtitorja bregdetare në Durrës është mbathur me rreth 400 metra kub rërë.
“Edhe këtu po zgjerohet hapësira e lëvizjes së kalimtarëve. Por këtu, nga deti përfitohen 5-6 metra që mbushen me gurë, por zhurma dhe pluhuri i përditshëm ka larguar shumë klientë,” shtoi ai.
Një zonjë e moshuar shpreson që punimet të sjellin rritjen e sipërfaqes së plazhit publik, vetëm se përvojat e kaluara e kanë lënë atë dyshuese.
“Ku ma gjen të shtohet sipërfaqja e plazhit publik. Vetëm se uroj që këtë vit ta kenë zgjidhur problemin e kanalizimeve, që derdhen pak më tej,” tha ajo.
Pavarësisht problemeve, çadrat shumëngjyrëshe apo kashtoret vazhdojnë të jenë plot me pushues, edhe pasi dielli nis të perëndojë mbi ujë. Turistë si Mendimi nga Peja kujtojnë se jemi në prag të solsticit veror dhe se nuk duhet humbur asnjë moment.
“Duhet të përfitojmë nga moti i mirë dhe ditët e gjata,” përfundoi ai.
Marrë nga Reporter.al
