Italianët kanë mbetur grupi i dytë me peshën më të madhe të vizitorëve pas Kosovës duke u rritur në janar-shkurt me 14.7 për qind në raport me të njëjtën periudhë të një viti më parë. Në janar-shkurt në vend u shënuan 126 mijë hyrje të shtetasve italianë, duke zënë gati 12% të totalit të hyrjeve.
Kosova vijon të mbetet e para. Të dhënat zyrtare të publikuara nga Instituti i Statistikave tregojnë se në dy muaj pushesit nga Kosova u rritën me 4.4 për qind në raport me janar-shkurt 2024, duke arritur në 431 mijë. Kosova zë 40.09 për qind të peshës totale të turistëve në vend duke vijuar të mbetet grupi kryesor që mban kontributin më të madh në sektor.
Ndërkohë grupe të tjera janë Mali i Zi dhe Maqedonia e Veriut që përkatësisht në peshën e turistëve mbajnë vendin e tretë (10.1%) dhe të katërt (9%). Si numër në janar-shkurt 2025 ishin 109 mijë shtetas nga Mali i Zi që hynë në territorin shqiptar me një rritje 18.7 për qind ndërkohë që nga Maqedonia e Veriut ishin 97.4 mijë me një rritje 9.5 për qind.
Turoperatorët vlerësojnë se përpos një rritje të vizitorëve që vijnë nga këto vende më shumë ndikim kanë hyrjet që janë me qëllim tranziti dhe që përdorin Aeroportin Ndërkombëtar të Tiranës për të udhëtuar në destinacione të ndryshme.
Falë linjave low cost që ofrojnë një gamë më të gjerë destinacionesh sesa fqinjët, Tirana është bërë një nga pikat më dinamike të tranziteve dhe këtë mund ta konfirmosh fare mirë nëse fluturon nga dhe për në Tiranë, ku sheh shumë shtetas nga Mali i Zi dhe Kosova.
Grupe të tjera që kanë shënuar rritje në dy muajt e parë janë gjermanët me një rritje 52 për qind, Franca me 35 për qind apo spanjollët me 33.5 për qind disa tendenca që janë vërejtur edhe gjatë vitit të shkuar. Spanjollët madje janë një prej grupeve që po vijnë në formë të organizuar prej disa kohësh edhe si efekt i hyrjes së një zinxhiri spanjoll hotelerie i vendosur në disa njësi kryesisht në rajonin e Durrësit.
Çekia dhe Suedia janë gjithashtu dy vende nga ku numri i vizitorëve ka qenë në rritje për janar-shkurt 2025 në raport me një vit më parë teksa bie në sy një rënie me 32 për qind e polakëve. Këta të fundit janë kryesisht një grup që preferon Shqipërinë për pushimet e verës në formë të organizuar dhe vendosur kryesisht në Golem e Durrës me paketa all inclusive.
Edhe për këtë verë ky grup është me rritje sipas konfirmimeve të turoperatorëve. Viti 2025 pritet që në tërësi të jetë një vit pozitiv për turizmin duke shfaqur tiparet e vitit 2024 si në ritmin e rritjes ashtu edhe të destinacionëve nga vijnë turistët e huaj ku Europa Perëndimore po merr një peshë të konsiderueshme dhe falë promovimit që vijon ti bëhet Shqipërisë në mediat ndërkombëtare.
Marrë nga Monitor
