Infeksioni i koncesioneve ka prekur edhe gjuetinë. Ministria e Mjedisit ka propozuar një projektligj, i cili praktikisht i jep zonat e gjuetisë me koncesion.
“Zonat e gjuetisë mund t’i jepen subjekteve private me anë të një procedure konkurrimi dhe për një afat jo më pak se 10 vjet, kjo për arsyen se sipas ekspertëve të fushës së gjuetisë, duhen të paktën 5 vjet për të përgatitur gjahun. Subjekti fizik ose juridik do të jetë njëkohësisht dhe menaxhuesi i zonës,” thuhet në relacionin e draftit.
Sipas projektligjit subjekti që do të marrë në përdorim zonën e gjuetisë do të paguajë qira në shtet.
“Vlera fillestare për qiranë e zonës së gjuetisë përcaktohet sa 50 për qind e vlerës të gjuetisë vjetore të kafshëve të egra, të planifikuara sipas planit të përdorimit të llojeve të zonës së gjuetisë, të llogaritura sipas çmimit të tregut. Vlera fillestare për qiranë e zonës së gjuetisë shërben si çmim dysheme për personat që do të marrin pjesë në konkurrimin publik,” thuhet në projektligj.
Më pas, privati do të ketë të drejtën e shfrytëzimit të zonës së gjuetisë sipas rregullave të përcaktuara në ligj. Sipas ligjit, zonat e gjuetisë do të shpallen me vendim të Këshillit të Ministrave. Zona e gjuetisë krijohet në sipërfaqe jo më të vogla se 500 hektarë, ndërsa zona për kultivimin e llojeve të faunës së egër, objekt gjuetie, krijohet në sipërfaqe jo më të vogla se 50 ha.
Marrë nga Kapital.al
