Ngadalësimi i ritmit të ndërtimit në Tiranë po bëhet tashmë i dukshëm, ndërsa tregu po jep sinjale të qarta ngopjeje.
Të dhënat e vrojtimit “Tregu i Pasurive të Paluajtshme” për gjashtëmujorin e parë 2025 tregojnë se koha mesatare e shitjes së banesave në kryeqytet është zgjatur ndjeshëm, duke reflektuar rënie të kërkesës dhe ngadalësim të transaksioneve.
Në të kundërt, zonat bregdetare po përjetojnë një dinamikë më pozitive, me kohë më të shpejtë shitjeje dhe interes më të lartë nga blerësit.
Sipas raportit, koha mesatare e shitjes së banesave në rang vendi u rrit në 11.6 muaj nga 9.3 muaj në vrojtimin e mëparshëm.
Tendenca është edhe më e theksuar në Tiranë, ku ky tregues është rritur nga 7.1 muaj në 11.1 muaj, duke kaluar mbi mesataren afatgjatë prej 10 muajsh. Ky ngadalësim reflekton qartë ngopjen e tregut të ndërtimit në kryeqytet, ku oferta e apartamenteve ka tejkaluar ritmin e kërkesës reale.
Në të kundërt, zonat bregdetare po shfaqin qartësisht dinamikë të kundërt.
Koha e shitjes së pronave në bregdet është ulur në 8.7 muaj nga 10 muaj, shumë poshtë mesatares afatgjatë prej 11.3 muajsh. Rritja e interesit për zonat turistike vjen në një kohë kur investimet dhe blerjet për qëllime pushimi apo qira afatshkurtër po rriten ndjeshëm.
Për zonat e tjera të vendit, koha e shitjes ka pësuar një rritje të lehtë në 12.8 muaj nga 11.6 muaj, duke reflektuar stabilitet më të ulët krahasuar me bregdetin.
Treguesit e kohëzgjatjes së shitjeve po konfirmojnë zhvendosjen e vëmendjes së tregut: Tirana po ngadalësohet, ndërsa bregdeti po përthith interesin e blerësve dhe investitorëve.
Këto sinjale sugjerojnë një ndryshim të fazës, ku sektori i ndërtimit në kryeqytet nuk po ecën më me ritmet e viteve të fundit, duke hapur rrugë për një balancim më të fortë të kërkesë-ofertës gjatë 2026 dhe për rënie të mundshme çmimesh në segmentet e ngopura të tregut.
Marrë nga Skyweb.al
